أمراض الوسواس القهري من الأمراض الشائعة. تقريبًا 0.5 لـ 3% من الناس عندهم واحد من أمراض الوسواس القهري.
إيه هي أنواع أمراض الوسواس القهري؟
اضطراب الوسواس القهري أو الـ Obsessive Compulsive Disorder.
اضطراب تشوه الجسم أو الـ Body Dysmorphic Disorder.
اضطراب هوس نتف الشعر أو الـ Trichotillomania.
اضطراب كشط الجلد أو الـ Excoriation Disorder.
اضطراب التخزين أو الـ Hoarding Disorder.
مُتلازمة الإحالة الشمّية أو الـ Olfactory Reference Syndrome. (طبقًا للـ ICD 11 )
هتكلم انهارده عن أول واحد وهو الوسواس القهري أو الـ OCD:
الوسواس القهري عبارة عن عرضين أساسيين:
الوساوس أو الـ Obsessions: ودي أفكار أو صور أو رغبات مُتكررة واقتحامية وغير مرغوبة. الأفكار دي بتكون مُقلقة جدًا والشخص بيكون مش عاوز يفكر فيها وبيحاول يتجاهلها أو يكبتها. زي مثلًا فكرة إن إيدي مُلوثة أوعليها بكتيريا.
الأفعال القهرية أو الـ Compulsions:
ودي ممكن تكون:
سلوك مُتكرر: أفعال بتتعمل أو كلام بيتقال عشان يقلل القلق الناتج عن الأفكار والصور والرغبات. يعني ممكن في لو في وسواس الإيد الملوثة يكون الفعل القهري هو إن الشخص يغسل إيده بصورة متكررة.
فعل عقلي أو Mental Act: تفكير الشخص بيفكّر فيه عشان يقلل القلق (العد بالتفكير من غير كلام أو التفكير في كلمة مُعينة أو تخيل صور مُعينة). يعني لو المريض تخيل إنه بيقتل حد ودا بيكون الوسواس بيتخيل بعدها إنه بيحضنه مثلًا ودا بيبقى الفعل القهري.
الأفعال القهرية ممكن تكون:
بسيطة: زي إني أقول كلمة أو أعمل فعل أو أفكر في فكرة تانية ودا زي كل الأمثلة اللي فوق.
مُعقدة: لدرجة إنه يبقى طقس أو Ritual زي مثلًا حد يستحمى بطريقة مُعينة وترتيب مُعين. أو حد يلبس بطريقة مُعينة.
ومن الحاجات الأساسية للتشخيص إن الوساوس والأفعال القهرية تستهلك وقت كبير من المريض على الأقل ساعة في اليوم أو بتتسبب في مشكلة وبتأثر على شُغله أو علاقاته. فمش كل حد يغسل إيده مرة ولا يروح يشوف الباب مقفول ولا لأ يبقى عنده وسواس قهري.
مثال على الوساوس والأفعال القهرية السلوكية المشهورة: الحد اللي بيكون شاكك إن إيده عليها جراثيم أو إنها مش نضيفة وبيغسل إيده بصورة متكررة جدًا لدرجة إن الجلد اللي عليها ممكن يكون قشّر.
مثال تاني على الوساوس والأفعال القهرية اللي بتكون في صورة فعل عقلي: مريضة كانت لما بتشوف حد من ولادها بييجي في بالها صور إنها بتطعنهم بالسكينة ودي صورة هي كارهاها وبتخاف منها ونفسها إنها تختفي وهي في الواقع بتحب ولادها جدًا وعُمرها ما أذت حد منهم، وكانت لما الصور دي بتيجي في بالها بتفكّر على طول في صورة بعدها إنها بتحضنهم عشان تستريح وتقلل القلق اللي بييجي من الصورة الأولى. وكانت بتحاول تتجنب أولادها عشان متشوفش الصور دي لكن هي لازم تتعامل مع أولادها فكانوا وهما حواليها بتبقى متعصبة وهما مش فاهمين هي متعصبة ليه.
أشهر الوساوس وأفعالها القهرية:
التلوث أو عدم النظافة: هنا الشخص بتجيله أفكار أو صور إن الحاجة مش نضيفة أو ممكن يكون عليها بكتيريا أو فيروسات وممكن تنقل العدوى. وهنا الفعل القهري ممكن يكون: التنظيف المُتكرر لحاجة زي غسيل الإيد المُتكرر.
النظام أوالتناسق: هنا الشخص بيجيله أفكار أو صور إن الحاجة اللي قُدامه مش متناسقة أو مش مُنظمة ولازم تتنظم. وهنا الفعل القهري بيكون التنظيم والترتيب: زي مثلًا حد بعد ما ينشر الهدوم ممكن يطبّق فيهم ويرتبهم ساعة أو ساعتين عشان يبقوا متناسقين.
الأمان: هنا الشخص بيشك هو عمل الحاجة الآمنة ولا نسيها. يعني مثلًا حد يفكّر هو نسي يقفل الباب ولا لأ. نسي يقفل الشباك ولا لأ. نسي يقفل البوتاجاز ولا لأ. وهنا الفعل القهري بيكون التدقيق أو التحقق: يعني يروح يشوف الشباك مقفول ولا لأ ويشوف الباب مقفول ولا لأ.
الشك (في حاجات في الذاكرة أو في الإدراك أو في حاجات عملها): هنا الشخص ممكن يُشك هو صلى عدد الركعات الصحيحة ولا لأ، أو وضوءه كان مظبوط ولا لأ. والفعل القهري ممكن يكون تكرار الصلاة أو تكرار الوضوء. أو الشخص ممكن يشك هو فاكر حاجة ولا لأ. يعني مثلًا هو أنا فاكر إني فلان سلم عليّا ولا لأ، وهنا الفعل القهري ممكن يكون مُجرد حاجة بعملها في دماغي (mental compulsion) زي إني أكرر الذاكرة في ذهني عشان أسترجعها وأشوف هي حصلت فعلًا ولا لأ.
الجنس والعُنف: هنا الشخص ممكن تجيله أفكار أو صور عنف أو جنس هو مش عاوز يفكّر فيها زي مثلًا أفكار أو صور جنسية هو مش حاببها زي تخيل حد من المحارم أو أفكار أو صور القتل أو الضرب أو الانتحار. وهنا ممكن يكون الفعل القهري مثلًا الاستغفار أو تخيل حاجة عقلية تانية.
الخطأ الأخلاقي أو القانوني: وهنا الشخص بيجيله أفكار إنه عمل حاجة غلط أخلاقيًا أو قانونيًا. يعني مثلًا الشخص يجيله أفكار إنه ممكن يكون عمل حاجة حرام زي مثلًا هو أنا لو مشيت جنب المسجد وأنا مش متوضيء دا يبقى حرام ولا لأ. هو أنا لو علّيت صوتي على أمي دا يبقى حرام ولا لأ. وهنا الفعل القهري ممكن يكون اعتراف أو السعي ورا التطمين من مصدر ديني أو مصدر قانوني. يعني أسأل شيخ أو حد كل شوية هو دا حلال ولا حرام وهكذا.
في حاجة مُهمة هنا اسمها المُحدد أو الـ Specifier:
المُحدد الأول: درجة الاستبصار بالوساوس أو الأفعال القهرية أو الـ Degree of insight. يعني لأي مدى المريض عارف إنها مش منطقية لكن بيعملها عشان يقلل القلق.
ودي أهميته إنه بُناءً عليه بنحدد الخطة العلاجية وممكن المريض يتحجز في المستشفى لو مفيش استبصار وفي خطورة على نفسه أو على الناس حواليه.
فدرجات الاستبصار هنا بتكون:
With good or fair insight: وهنا المريض بيكون عارف إن الوساوس والأفعال القهرية مش منطقية لكن بيحس إنه مضطر يعملها.
With poor insight: وهنا المريض بيفكّر إنه ممكن الواساوس والأفعال القهرية دي تكون حقيقية ومنطقية. لكنه مش مُتأكد.
With absent insight/delusional beliefs: وهنا المريض بيبقى مُتأكد إن الوساوس والأفعال القهرية حقيقية وإنها منطقية جدًا. وهنا المريض لو في عليه خطورة ممكن يتحجز في المستشفى.
المُحدد التاني: اسمه Tic-related : ودا معناه إن المريض عنده وسواس قهري ومُصاحب له تاريخ مرضي طويل من الـ chronic tic disorder أو عنده لازمة حركية مُزمنة ودا أهميته إن في بعض الدراسات بتقول إن استجابتهم بتكون ضعيفة للـ Antidepressants وإن الـ Antipsychotics ممكن تساعد أكتر هنا.
المسار أو الـ Course بتاع المرض بيكون إزاي؟
غالبًا بيبدأ فجأة بعد حدث ضاغط على الشخص زي مثلًا فقد أو حمل أو مُشكلة جنسية أو Trauma. وغالبًا الشخص بيطلب المُساعدة بعد فترة طويلة بسبب الحرج.
إيه الأمراض النفسية التانية المُرتبطة بالـ OCD أو Comorbid معاه؟
الاكتئاب. حوالي 50-70% من الناس اللي عندها وسواس قهري بيكون مُصاحب له اكتئاب فمهم نسأل عن الأعراض.
الفُصام أو الـ Schizophrenia: أحيانًا بتكون بداية الـ Presentation هو الـ OCD وبعدين تظهر أعراض الـ Schizophrenia. وأحيانًا الـ Bipolar برده.
الـ Tic disorders عمومًا.
في سمات شخصية بتبقى مُصاحبة أحيانًا للـ OCD زي السمات التجنبية (Avoidant) أو الاعتمادية (Dependent) أو الهيستيرية (Histrionic).
أحيانًا بيكون مُصاحب له PTSD.
لو حد عنده إضافة أو تعديل يا ريت يشاركنا عشان بستفيد من إضافاتكم.
والمرة الجاية هتكلم عن التفسيرات البيولوجية والنفسية للوسواس القهري إن شاء الله.
المصادر:
DSM-5 Made Easy, James Morrison.
Oxford Handbook of Psychiatry.
الجزء دا تكملة لأنواع الإفصاح عن الذات اللي هو جُزء من الاتساق أو الـ Congruence. لو مشفتش الجُزء اللي فات يُستحسن تشوفه.
النوع التاني من الإفصاح عن الذات أو الـ Self-disclosure: الإفصاح عن حياتك الشخصية.
أعتقد في عندنا مفهوم شائع: إنه إحنا مينفعش نتكلم عن نفسنا ولا نشارك أي حاجة شخصية في العلاج النفسي. وأعتقد في خوف عندنا إننا لو شاركنا دا هيبوظ العلاقة العلاجية والعميل مش هيبطّل أسئلة عننا وهيبقى عاوز يعرف أكتر.
تعالى نشوف المفهوم دا جه منين وليه؟
فرويد وفكرة اللوحة البيضاء أو الـ Blank screen:
فرويد كان بيقول إن المُعالج المفروض يبقى لوحة بيضاء ويكون مُحايد تمامًا وميظهرش منه أي حاجة تعبّر عنه شخصيًا على أمل إن المريض يطرح عليه علاقته بالأب أو الأم فنشوف الطرح دا أو الـ Transference ونحلله. ولو المُعالج أظهر نفسه على إنه شخص عادي، الطرح دا هيكون صعب.
بس دا هينتج عنه إننا نضحي بعلاقة حقيقية بين المعالج والعميل (اللي هو كل الدراسات دلوقتي بتقول إن هي أهم حاجة في العلاج النفسي). فهل دا يستاهل؟ وهل فرويد نفسه كان بيعمل دا في شُغله أصلًا؟
من كتابات فرويد نفسه، ومن كتابات بعض الناس اللي كانوا عنده إنه لأ، فرويد نفسه مكنش بيعمل دا طول الوقت. فرويد كان بيقدّم اقتراحات وكان بيتدخل مع عائلة المريض بنفسه. وكان أحيانًا بيحضر مناسبات اجتماعية عشان يشوف المريض بيتصرف إزاي.
قبل ما نتكلم عن إظهار حياتنا الشخصية: في حاجتين مهمين جدًا لازم نعرفهم:
الكلام عن حياتك الشخصية يكون هدفه مصلحة العميل: مش لمصلحتك انت، ولو جت الرغبة في حكي حاجة شخصية أثناء العلاج بنحتاج نسأل نفسنا: أنا عاوز أعمل دا دلوقتي ليه؟ ليا ولا للعميل؟
العميل له حق السرّية أما انت ملكش الحق دا. والعميل ممكن يتكلم عن اللي انت بتظهره لأي حد تاني سواء مُعالج بعدك أو أي حد. فلو في حاجة في حياتك الشخصية انت مش مستريح إن الناس ممكن تعرفها عنك متتكلمش عنها.
إيه أنواع الكلام عن حياتنا الشخصية أصلًا؟
أولًا: الحاجات العامة: اللي ممكن نتكلم مع أي حد في الشارع عنها، زي إحنا بنحب إيه ومبنحبش إيه وهواياتنا والكُتب والأفلام والمُسلسلات والأغاني اللي بنحبها، والتجارب البشرية العامة.
طيب إيه فايدة الكلام عن حاجة زي كدا؟
إحنا كبشر بنحب الناس اللي شبهنا واللي بيحبوا نفس الحاجات وعندهم آراء مُشابهة لآرائنا، فلو في حاجة انت بتحبها فعلًا والعميل اتكلم عنها، ممكن تشارك بإنك بتحب نفس الحاجة وتتكلموا عنها شوية. ودا بيحسن العلاقة. (وفي دراسات كتير عن دا. هسيب لينك الدراسة في الآخر)
أنا لما بلاقي في حاجة مُشتركة أو اهتمام مُشترك بقول عادي، وبشوف إن دا بيقوّي العلاقة فعلًا وبيخليها حقيقية أكتر.
ثانيًا: التجارب أو المشاعر المُشتركة: (ودي منطقة هترجع لرؤيتك لنفسك ورؤيتك للعميل ولحاجات كتير وعليها اختلاف):
كتير من الناس بيبقوا مُحملين بالذنب والعار من مُجرد أفكار أو تخيلات أو مشاعر بيبقوا شايفينها أنانية أو سادية أو جنسية وبيبقوا شايفين إنهم مينفعش حتى يفكروا في الأفكار دي أو يتخيلوها أو مينفعش يحسوا بالمشاعر دي. وبيبقوا شايفين إن مُجرد التخيل أو التفكير يقول إنهم مش كويسين. لكن الحقيقة إن إحنا كبشر كلنا أوقات بيجيلنا أفكار وتخيلات وبنحس بمشاعر بتكون مش مقبولة اجتماعيًا زي تخيلات العُنف والتخيلات الجنسية ومشاعر الغيرة والحسد و ومش معنى إن إحنا فكّرنا فيها أو حسّينا بيها إننا وحشين. يُونج بيسمّي الجُزء دا مننا الـ Shadow أو الظل.
يعني مثلًا إرفين يالوم بيحكي عن إن كان عنده عميلة بتحكي إنها لما بتقعد مع أمها الكبيرة في السن وتحس بالملل وإنها عاوزة تقوم بعد ساعتين من القعدة بتحس بالذنب وبتلوم نفسها إنها إبنة مش كويسة. فبيقول إنه ممكن يشارك إنه بيحس بنفس المشاعر هو كمان.
وبرده بيحكي إنه كان أوقات بيفكّر في الميراث اللي هياخده بعد ما أبوه هيموت، مع إنه كان بيحبه وعمره ما كان بيتمنى موته وكان لما يفكّر في كدا بيحس بالذنب وإنه ابن وحش، لحد ما المُعالج بتاعه قاله إنه كمان بيجيله نفس الأفكار.
لو انت مش مرتاح في المُشاركة بحاجة زي كدا، ممكن تتكلم في إن المشاعر دي عادية وإننا كبشر بنحس بحاجات مُشابهة. دا نوع من أنواع الـ Normalization ولما حد مننا بيحس إنه مش لوحده وإن اللي بيحس بيه دا مُشترك بيرتاح.
وتاني متشاركش بحاجة انت مش مستريح إن الناس تعرفها عنّك وافتكر إن ملكش حق السريّة.
في حاجة أخيرة مهمة هنا برده:
Don’t normalize what’s not normal.
أو متقولش على حاجة مش عادية إنها عادية.
لو شاركت عميل بحاجة شخصية يا ريت تقولنا رد الفعل كان إيه.
ولو عندك تعديل أو إضافة يا ريت تشاركنا.
المصادر:
The Gift of Therapy, Irvin Yalom.
قبل أي حاجة، حوالي 10% من السيدات بيجيلهم اكتئاب أثناء الحمل أو بيكون جالهم قبل كدا.
الحمل بيزود احتمالية الـ Relapse للسيدات اللي جالها نوبات اكتئاب قبل الحمل.
قبل ما نتكلم عن مخاطر مُضادات الاكتئاب أثناء الحمل، هل الاكتئاب نفسه له مخاطر؟
في بعض الدراسات بتقول إن الاكتئاب نفسه بيزود بنسبة بسيطة احتمالية الاجهاض والولادة المبكرة وإن الجنين يكون وزنه أقل وقت الولادة.
الاكتئاب نفسه ممكن يخلي الأم تهمل رعايتها لنفسها أو تقلل متابعاتها للحمل (الـ obstetric care) أو تأذي نفسها.
هل مضادات الاكتئاب عمومًا ليها مخاطر على الأم أو الجنين؟
في بعض الدراسات بتقول إنهم احتمال يكونوا بيزودوا احتمالية الإجهاض والولادة المبكرة ونقص وزن الجنين وقت الولادة. (الدراسات دي observational ومحطتش في الحُسبان مخاطر الاكتئاب نفسه).
في دراسة فنلاندية اتعملت على عدد كبير لقت إن في ارتباط ما بين استخدام الـ SSRIs في الحمل وقلة احتمالية حدوث الولادة المُبكرة والولادة القيصرية مُقارنةً بالسيدات اللي عندهم اكتئاب ومأخدوش SSRIs.
في احتمالية إن مُضادات الاكتئاب ممكن تزود احتمالية الإصابة بالـ Hypertension و الـ Preeclampsia و الـ Post-partum haemorrhage.
تعالى نبص عليهم بالتفصيل:
إيه هي مخاطر الـ TCAs أو الـ Tricyclic Antidepressants في الحمل؟
تعرض الجنين للـ TCAs بيكون عالي (عن طريق الـ Placenta والـ Amniotic fluid).
الـ TCAs استخدمت كتير أثناء الحمل ومحصلتش أي أضرار واضحة على الأجنة.
في ارتباط ضعيف جدًا ما بين استخدام الـ Clomipramine و Cardiovascular Defects.
استخدام الـ TCAs في 3rd Trimester بيعمل أعراض انسحاب عند الوليد زي العصبية والعياط وضيق التنفس. بس دول بيبقوا Mild و Self-limiting.
الـ SSRIs في الحمل:
الـ SSRIs مش Major Teratogens أو مش بيعملوا تشوهات خطيرة.
الـ Sertraline هو أقلهم وصولًا للجنين.
في علاقة ما بين الـ Paroxetine تحديدًا و ما بين الـ Cardiac Malformations خاصةً خلال الـ 1st trimester.
استخدام الـ Paroxetine في الـ 3rd trimester بيزود خطورة أعراض الانسحاب اللي ممكن تحصل عند الوليد.
مُضادات الاكتئاب الأخرى:
الـ Duloxetine:
برده مش Major teratogen.
ممكن يكون مُرتبط بزيادة بسيطة في الخطورة للـ Post-partum hemorrhage.
الـ Venlafaxine:
في ارتباط بينه وبين الـ Cardiac defects والـ Anencephaly والـ Cleft palate وأعراض الانسحاب للوليد والـ Post-partum hemorrhage.
في دراسة جديدة بتقول إن في ارتباط بين أخدانه في الـ 1st trimester والـ Major congenital malformations.
الـ Trazodone والـ Bupropion والـ Mirtazapine:
مفيش حاجة كفاية تقول إنهم أمان في الحمل.
الـ ECT:
مفيش أي دليل يقول إن الـ ECT بيمثل خطورة على الأم أو الجنين، بس الـ General Anesthesia ليها خطورة.
الـ ECT بيتاخد في حالات الـ Severe Depression اللي بيكون فيها خطورة شديدة على الأم أو الجنين.
المُلخص:
المريضة اللي ماشية على مُضاد اكتئاب وفي خطورة كبيرة للـ Relapse الأفضل إنها تكمل على نفس مُضاد الاكتئاب اللي هي ماشية عليها. (في ناس بتغيّر للـ Sertraline عشان أأمن).
مُضادات الاكتئاب للمرضى اللي بيجيلهم Moderate أو Severe Depression. لو Mild الأحسن Psychotherapy أو Self Help أو أي تدخل تاني غير العلاج الدوائي.
لو المريضة أول مرة يجيلها اكتئاب أثناء الحمل ومتوسط أو شديد في الدرجة، فكّر في Sertraline بما إنه الأأمن والأقل وصولًا للجنين.
الوليد ممكن يحصله أعراض انسحاب وغالبًا بتكون بسيطة. واحتمالية حدوثها بتزيد مع الحاجات اللي ليها Short half life زي الـ Paroxetine والـ Venlafaxine.
لو حد عنده تعديل أو إضافة يا ريت يشاركنا
المصدر:
The Maudsley Prescribing Guidelines.