هكمل كلام انهارده عن طريقة السؤال عن الانتحار. المرات اللي فاتت اتكلمت عن الخطوة الأولى والخطوة التانية من الطريقة اللي هما:
استكشاف أحداث الانتحار الحالية أو الـ Presenting events.
استكشاف احداث الانتحار الحديثة (خلال آخر شهرين) أو الـ Recent events.
انهارده هتكلم عن الخطوة التالتة والرابعة اللي هما:
استكشاف أحداث الانتحار القديمة (اللي قبل آخر شهرين) أو الـ Past evens.
استكشاف أحداث الانتحار اللي جت وقت الإنترفيو أو الـ Immediate events.
إيه هو هدف الخطوة التالتة؟
إيه هي أخطر محاولة انتحار حصلت في الفترة قبل آخر شهرين. (مش هنسأل عن الأفكار ولا الخطط هنا ولا بقية المحاولات بالتفصيل - دا في الماضي فأهميتهم قليلة خاصةً مع ضيق الوقت)
لو في محاولة انتحار خطيرة هنبقى عاوزين نعرف الضغوط اللي أدّت إليها، عشان لو نفس الضغوط موجودة دلوقتي خطورة تكرار المحاولة هتكون أعلى. زي حد حاول ينتحر قبل كدا بعد break up مثلًا ودلوقتي في طلاق أو break up عمومًا.
إيه هو عدد المحاولات تقريبًا. (عشان عدد المحاولات الكتير جدًا اللي مش خطيرة بتكون ليها هدف تاني غير الموت غالبًا- وعشان أحيانًا المريض اللي حاول كتير بيكون عارف إيه اللي يموت وإيه اللي ميموتش فممكن التكرار يزود الخطورة أو practice makes perfect).
مثال لتوضيح الخطوة التالتة:
الطبيب: هل حاولت تموّت نفسك قبل كدا قبل الشهرين دول؟
المريض: كتير...
الطبيب: حوالي كام مرة تقريبًا؟ (السؤال عن التفاصيل أو fact finding)
المريض: حوالي 20 مرة ولا حاجة.
الطبيب: ممكن تحكيلي عن أخطر محاولة فيهم؟
المريض: من زمان أوي قبل ما أقابل سالي. كنت مصاحب واحدة ولما سابتني حاولت أنتحر.
الطبيب: إيه اللي حصل وقتها؟ ( السؤال عن التفاصيل أو fact finding)
المريض: بعد ما سبتني دوّرت على الطبنجة اللي عند والدي وطلّعتها.
الطبيب: وإيه اللي حصل بعدها؟ (التسلسل أو Sequencing)
المريض: ولا حاجة. رجّعتها مكانها. حتى وقتها كنت عارف إن مش هو دا الحل.
الطبيب: كويس إنك أخدت القرار الصح. كان في حاجة تانية مضايقاك وقتها غير إن صاحبتك سابتك؟ (بنسأل على الضغوط اللي أدّت للمحاولة)
لا، مكنش في حاجة تانية.
الخطوة الرابعة:استكشاف أحداث الانتحار اللي جت وقت الإنترفيو أو الـ Immediate events.
إيه هو هدف الخطوة الرابعة؟
هل في أفكار انتحار جديدة جت للمريض أثناء الإنترفيو؟
إيه مدى قوة رغبة المريض في الموت؟
هل في نية إن المريض يموت نفسه؟ (الفرق بين الرغبة والنية إن المريض ممكن يكون عنده رغبة شديدة في الموت بس شايف إن في سبب يمنعه وبالتالي معندوش أي نية زي مثلًا إن الانتحار حرام أو إنه ميقدرش يسيب ولاده)
مثال لتوضيح الخطوة الرابعة:
الطبيب: إحنا بقالنا شوية بنتكلم دلوقتي، فكنت عاوز أعرف هل جالك أفكار جديدة إنك تموت نفسك دلوقتي وإحنا بنتكلم؟ (سؤال عن أفكار الانتحار الجديدة)
المريض: لا..
الطبيب: طيب حاسس بإيه دلوقتي تجاه الموضوع؟ (بنحاول نشوف قوة الرغبة)
المريض: مش عارف الحقيقة.. أنا أحسن شوية بعد ما اتكلمت معاك بس مش عارف.
الطبيب: كنت عاوز أسألك عن إيه الحاجات اللي في حياتك اللي عاوز تكمل عشانها؟ (السؤال عن النية بطريقة غير مباشرة وفي نفس الوقت محاولة إننا نخلي المريض يدور على الحاجات الكويسة في حياته اللي عاوز يكمل عشانها - أنا بحب السؤال دا -)
المريض: عاوز تعرف بجد؟
الطبيب: آه.. أكيد.
المريض: ولا حاجة..
بكدا تكون طريقة استكشاف أحداث الانتحار خلصت بخطواتها الأربعة. وهكمل المرة الجاية إن شاء الله عن إزاي نحط خطة للتعامل مع الانتحار سواء جوه أو برا المستشفى.
في حاجة عاوز أضيفها: إن في حاجات في الطريقة في الكتاب أنا مش بقولها عشان التبسيط وعشان اختلاف الثقافة. فلو حد عاوز يرجع للطريقة بالظبط زي ما هي هيلاقيها في الكتاب بتاع شيي.
أتمنى الطريقة تساعدكم في استكشاف الانتحار لإنها ساعدتني جدًا وسهلت الموضوع عليا.
لو حد عنده أي تعديل أو إضافة يا ريت يشاركنا.
الجزء الأول من هنا.
الجزء التاني من هنا.
المصدر:
Psychiatric Interviewing,Shawn Christopher Shea.