top of page

إزاي نسأل عن الانتحار؟ (الجُزء الأول)

إحنا ساعات بنقابل مرضى عندهم أفكار كتيرة جدًا للانتحار. وممكن يكون عندهم خطط للانتحار أو يكونوا حاولوا كذا مرة. فبنبقى تايهين ومش عارفين نبدأ منين. ونسأل عن كل دا إزاي. ودا كله مهم ولا لأ. وإيه أهميته. فشيي عامل طريقة لاستكشاف الانتحار هتخلينا مُنظمين في السؤال عشان مننساش أو منعديش حاجة مهمة. الطريقة دي اسمها CASE Approach أو Chronological Assessment of Suicide Events.


إيه هو هدف الطريقة دي؟

  • إننا نستكشف الأفكار والخطط والمحاولات بطريقة مُفصلة بحيث لما ناخد قرار نبقى واخدينه بُناءً على معلومات مظبوطة.

  • استخدام كل التكنيكات المُمكنة عشان المعلومات اللي المريض يقولها تكون حقيقية أو أقرب للحقيقة (عشان كنا قُلنا قد إيه صعب على مرضى كتير إنهم يتكلموا في الانتحار).


فأنا هشرح الطريقة دي من خلال حوار طبيب مع مريضة. وهعلّق بين الأقواس على ليه الطبيب بيسأل الأسئلة دي واسم التكنيك المُستخدم في السؤال.


الصورة الكبيرة للطريقة دي عبارة عن 4 خطوات كبيرة:

  • الخطوة الأولى: استكشاف أحداث الانتحار الحالية أو الـ Presenting events.

  • الخطوة التانية: استكشاف احداث الانتحار الحديثة (خلال آخر شهرين) أو الـ Recent events.

  • الخطوة التالتة: استكشاف أحداث الانتحار القديمة (اللي قبل آخر شهرين) أو الـ Past evens.

  • الخطوة الرابعة: استكشاف أفكار الانتحار اللي جت وقت الإنترفيو أو الـ Immediate events.


انهارده هتكلم عن الخطوة الأولى اللي هي استكشاف أحداث الانتحار الحالية أو الـ Presenting events من خلال الحوار الجاي دا:


  • الطبيب: أوقات لما الناس تمر بحُزن شديد ييجي في بالهم أفكار إنهم يموتوا نفسهم. جالك فكرة زي دي قبل كدا؟ (دا تكنيك اسمه Normalization وهو إننا بنقول للمريض إنه عادي إنك يجيلك أفكار زي كدا وإنك مش لوحدك اللي فكرت في دا، فبيسهل المُصارحة على المريض وإنه يقول لو في أفكار)

  • المريضة: ممم، الأفكار بتيجي وتروح.

  • الطبيب: إيه الأفكار اللي جت في بالك؟

  • المريضة: إني آخد شوية أقراص.

  • الطبيب: فكّرتي في نوع أقراص معين؟ (دا تكنيك اسمه السؤال عن التفاصيل المحددة أو fact finding behavioral incident ، وهو إننا بنسأل عن حقائق مُحددة، عشان زي ما هو مشهور: الشيطان يكمن في التفاصيل).

  • المريضة: عندي كذا شريط بانادول في البيت هما دول اللي جم على بالي.

  • الطبيب: هل مسكتي شريط في إيدك وانتي بتفكري في مرّة؟ (دا تكنيك اسمه "الطريقة-في-الإيد" أو "method-in-hand-question" عشان نشوف هل المريض وصل فين في قُربه للانتحار- ساعات ناس بتسأل بعد ما المريض يقول إن في أفكار انتحارية: "طيب جه في بالك خطة للانتحار؟" وأعتقد إننا نعرف الأفكار الأول وبعدها نسأل سؤال "الطريقة-في-الإيد" دا أحسن)

  • المريضة: أيوة من فترة.

  • الطبيب: دا كان امتى بالظبط؟ (تكنيك السؤال عن التفاصيل المحددة أو fact finding)

  • المريضة: من حوالي 4 أيام. كنت راجعة من الشُغل وكان يوم من أيامي الوحشة.

  • الطبيب: وكنتي فين لما مسكتي الشريط في إيدك؟ (دا تكنيك اسمه "التثبيت" أو الـ Anchoring ودا متاخد من الـ CBT والتكنيك دا عبارة عن إننا بنسأل عن المكان والزمان بتوع الحاجة اللي حصلت عشان ننشط الذاكرة والمعلومات اللي المريض يقولها تكون أدّق)

  • المريضة: كنت في أوضة النوم.

  • الطبيب: يعني من 4 أيام كنتي في أوضة النوم وكنتي ماسكة الشريط. إيه اللي حصل بعدها على طول؟ (ودا تكنيك اسمه "التسلسل" أو الـ Sequencing ودا بنسأل عن اللي حصل بالتسلسل كإننا بنتفرج على فيديو عشان مفيش تفاصيل مهمة تعدي)

  • المريضة: أخدت شوية أقراص.

  • الطبيب: أخدتي كام قُرص بالظبط؟ (السؤال عن التفاصيل أو fact finding)

  • المريضة: مش كتير.

  • الطبيب: يعني تقريبًا كدا كام؟ (السؤال عن التفاصيل أو fact finding)

  • المريضة: 5 أو 6.

  • الطبيب: كان في أقراص باقية في الشريط؟ (السؤال عن التفاصيل أو fact finding)

  • المريضة: أيوة كان باقي حوالي 4 أقراص وكان في شريط تاني.

  • الطبيب: طيب أخدتي حاجة تانية؟ (السؤال عن التفاصيل أو fact finding)

  • المريضة: لا. هما دول بس.

  • الطبيب: تمام، وإيه اللي حصل بعدها؟ (التسلسل أو Sequencing)

  • المريضة: وصلت في النهاية للطوارىء.

(هنا دلوقتي حصل فجوة في التسلسل أو gap. المريضة أخدت 6 أقراص ومنعرفش إيه اللي حصل بعدها لحد ما وصلت للطوارىء. فلما نلاقي أي فجوات لازم نرجع المريضة تاني للي حصل عشان نعرف إيه اللي حصل في الفجوة)

  • الطبيب: معلش خلينا نرجع للي حصل. عملتي إيه بعد ما أخدتي ال 4 أقراص؟ (التسلسل أو Sequencing)

  • المريضة: آه… كلمت أختي.

  • الطبيب: وقلتيلها إيه؟ (التسلسل أو Sequencing)

  • المريضة: قلتلها إني عملت حاجة غبية وأخدت شوية أقراص، ويا ريت تيجي تاخدني توديني الطوارىء.

  • الطبيب: وإيه اللي حصل بعدها؟ (التسلسل أو Sequencing)

  • المريضة: جت على طول وودتني المتسشفى...


زي ما شُفنا من البداية بالطريقة اللي هو بيقدمها في الأسئلة وخاصةً بالتسلسل والسؤال عن التفاصيل وكمان بسد الفجوة اللي حصلت في الحكي، عرفنا إن المريض أخدت عدد قليل من الأقراص، وسابت أقراص مأخدتهاش، وكلمت أختها بعدها ودا بيدل على نية أقل في الانتحار، ودا ممكن يكون السبب في عدم حجز المريضة حجز مالوش لازمة.


طيب ليه التكنيكين دول بالذات وليه هما كويسين جدًا؟

عشان بنحتاج نحدد الخطورة وكنت اتكلمت عن الخطورة هنا قبل كدا.فعشان نحدد الخطورة هنحتاج نسأل أسئلة كتير، وممكن ننسى نسأل أسئلة كتير منها. فالطريقة دي بتعرفنا اللي حصل بالظبط كإننا بنتفرج على فيديو من غير ما نحفظ أسئلة كتير والطريقة نفسها سهلة.


طيب مُلخص الطريقة في الخطوة الأولى عن الأحداث الحالية للانتحار:

  • بنعمل normalization في الأول وبنسأل عن الأفكار.

  • بنسأل عن طبيعة الأفكار.

  • بنسأل سؤال "الطريقة- في- الإيد" لو في أفكار.

  • بعدها بنسأل عن تسلسل اللي حصل بالظبط بأسئلة التسلسل والأسئلة عن الحقايق.

  • من الحاجات اللي بتزود دقة التفاصيل إننا نسأل عن المكان والزمان. "التثبيت".


لو حد عنده إضافة أو تعديل أو أي طُرق شخصية هو بيستخدمها يا ريت يشاركنا.

والمرة الجاية هكمل كلام عن بقية خطوات الطريقة إن شاء الله.

المصدر:

Psychiatric Interviewing,Shawn Christopher Shea.


المنشورات الأخيرة

إظهار الكل

في المكان الذي أتيت منه.. عندما يسأل أحدنا سؤالًا مثيرًا ننحني له. جوستيان جاردر الأسئلة سلاح ذو حدين. ممكن تبقى هي الأنسب في وقت مُعين ومع مريض مُعين وممكن تبقى أكتر حاجة مُعطلة في وقت تاني ومع حد تا

Post: Blog2_Post
bottom of page