أمراض القلق هي أكثر الأمراض شُيوعًا في الطب النفسي. تقريبًا كدا بيظهر عند 11-14 شخص من كل 100 مرض من أمراض القلق في السنة الواحدة.
انهارده هتكلم فيهم عن:
الفرق بين القلق العادي والقلق المرضي.
الأمراض نفسها الأول.
إزاي نوصل لتشخيص لو مريض جاي بأعراض قلق.
إزاي نفرق بين القلق العادي والقلق المرضي؟
في 4 فروق ما بين القلق العادي والمرضي:
القلق العادي بيكون مُجرد أفكار. القلق المرضي بيكون أفكار وأحاسيس جسدية: يعني ممكن ضربات القلب تزيد، التنفس يبقى أسرع، ييجي صُداع، الجهاز الهضمي يتأثر وتحصل مشاكل في الهضم والمعدة والقولون وتظهر أعراض زي عُسر الهضم والإمساك والإسهال.
القلق العادي بيكون مُحدد وعن حاجة مُعينة زي امتحان جاي وبيكون موجه لحل المشكلة زي إنك تذاكر أكتر. القلق المرضي ممكن يكون محدد وممكن يكون عام، والأكتر فيه إنه محتواه بيكون توقع الأسوء أو تفسيرات كارثية (Catastrophization) من غير إيجاد حلول للمشاكل.
القلق العادي بيكون مؤقت أما القلق المرضي بيكون ممتد ومستمر لفترات طويلة.
القلق العادي طبيعي جدًا ومفيد وبيساعدنا في حياتنا وشُغلنا. القلق المرضي بيعطّل حياتنا سواء على مستوى العلاقات أو الشغل.
حاجة مهمة عن أمراض القلق قبل ما أتكلم عنهم بالتفصيل:
أمراض القلق بتحب الصُحبة، يعني كتير بنلاقي comorbidities سواء من أمراض القلق نفسهم أو من الـ Somatic symptoms disorders أو الـ OCD أو الDepression أو Substance use أو الـ Personality disorders أوغيرهم.
شكل المرض بيختلف من وقت للتاني مع نفس المريض. يعني ممكن يبدأ القلق بمرض الهلع أو Panic disorder وبعدين يتحول لاضطراب القلق العام أو الـ GAD وبعدين يتحول لشكل تاني وهكذا.
إيه هي أمراض القلق في البالغين؟ (بُناءً على تقسيمة الـ DSM-5)
Panic Attack Specifier
Panic Disorder
Agoraphobia
Generalized Anxiety disorder
Social Anxiety Disorder
Anxiety disorder due to a medical condition / substance / drug
هتكلم انهارده عن أول 3 منهم:
الـ Panic attack أو نوبة الهلع:
نوبة بتيجي للمريض فجأة بيحس فيها إن مُصيبة هتحصل أو هيموت أو هيتجنن بتوصل للذروة خلال دقايق وبعدين تقلل بالتدريج. المتوسط إنها تقعد من ربع ساعة لساعة (أحيانًا يبقى في أعراض قلق تستمر بعدها والمريض بيتخيل إنها لسه مكملة وهي بتكون خلصت لكن بيُخطىء أعراض القلق على إنها أعراض النوبة) وبيكون معاها الأعراض دي:
تسارع ضربات القلب أو ألم في الصدر.
التنفس السريع أو الإحساس بضيق النفس أو الخنقة. (دا واللي فوق من أشهر الأعراض).
رعشة أو تنميل أو برودة في الإيد وممكن عرق.
الإحساس بالدوخة أو الدوار أو الصُداع.
الإحساس بالغُمة أو بألم في المعدة.
أحيانًا بتكون مصاحبة بإحساس من دول:
الـ Derealization: ودا معناه إنه بيحس إنه مش في الواقع كإنه في فيلم أو حلم.
الـ Depersonalization: بيحس إنه برا نفسه وكإنه شايف نفسه من برا.
شوية ملحوظات مهمة عن الـ Panic attack:
شائعة جدًا وتقريبًا 30% من البالغين على الأقل جالهم نوبة.
هي في حد ذاتها مش مرض. ممكن تكون مُصاحبة لأمراض كتير أو لو بقت متكررة وبقى في خوف منها بين النوبات وبدأت تأثر على الوظيفة يبقى كدا بقت Panic disorder.
أحيانًا يكون لها مثير معروف أو Trigger زي مثلًا في الأماكن المفتوحة أو المغلقة أو حاجة معينة ودي بتكون اسمها Situational Panic Attack. وأحيانًا تحصل من غير Trigger مُحدد ودي بيبقى اسمها Spontaneous Panic Attack.
ممكن تيجي أثناء النوم ودي اسمها Nocturnal Panic Attack.
مرض الهلع أو الـ Panic disorder:
نوبات هلع مُتكررة وغالبًا بتكون Spontaneous. (هنا اللي بيحصل غالبًا إن المريض بيراقب وظائف جسمه الحيوية عشان يتأكد إن النوبة هتيجي ولا لأ زي إنه مثلًا يراقب ضربات قلبه أو تنفسه، وأول لما يحصل تغير بسيط، بيدي للتغير البسيط دا معنى كارثي زي إنه التغير دا معناه إني هموت أو كدا النوبة هتيجي، فالقلق يزيد وبالتالي الأعراض الجسدية تزيد ودا يأكدله إحساسه إن في مُصيبة هتحصل والدايرة المُغلقة تستمر. دا طبقًا للنموذج المعرفي السلوكي)
حاجة من الاتنين الجايين أو الاتنين مع بعض لمدة شهر على الأقل:
بين النوبات بيكون في قلق من حدوث النوبة تاني أو من عواقبها لو جت (زي إني هموت لو جاتلي النوبة أو هتجنن أو هتجيلي ذبحة صدرية).
يحصل تغير في السلوكيات اللي ليها علاقة بأعراض النوبة. يعني المريض ممكن يتجنب أي حاجة بيتخيل إنها هتتسبب في حدوث الـ Panic attack، يعني مثلًا لو من أعراض النوبة ضربات القلب الزيادة ممكن ميلعبش أي رياضة أو ميعملش أي حاجة ترفع ضربات القلب عشان ميدخلش في نوبة تاني. أو لو حصلت في مكان مُعين ممكن يتجنب المكان دا.
حاجة مهمة جدًا هنا:
أي مريض عنده Panic disorder لازم نسأل عن الانتحار ونعمل Suicide Assessment عشان خطورة الانتحار بتعلى مع الـ Panic disorder.
رُهاب الأماكن المفتوحة أو الـ Agoraphobia:
خوف شديد أو نوبات هلع مع التعرض لأماكن أو مواقف مُحرجة أو صعب الهروب منها أو المريض مش هيقدر يلاقي فيها مساعدة لو حصل له حاجة (زي الأماكن الزحمة زي المولات أو المواصلات العامة أو خروج المريض لوحده من البيت أو السفر لمكان بعيد لوحده).
المريض بيتجنب الأماكن والمواقف دي تمامًا ولو تعرض ليها بيحصل خوف شديد جدًا أو نوبة هلع.
أوقات كتير بتكون مصاحبة للـ Panic disorder و الـ Social anxiety والـ Depression والـ Substance Use.
الأعراض تستمر لأكتر من 6 شهور.
لو حد عنده تعديل أو إضافة يا ريت يتفضل.
المصادر:
DSM-5 Made Easy, James Morrison.
Oxford Handbook of Psychiatry.