تعالى نسمع من الناس اللي بتعاني من المرض بنفسهم:
"بدأت أنتف شعري وأنا عندي 12 سنة تقريبًا. وفي وقتها مكنتش حاسة أنا بعمل إيه. كنت بنتف شعري وأنا نايمة على السرير وبفكر في حاجات تانية. ولما كُنت في الإعدادية بقى مسموحلي أحط ميك أب وبدأت أستعمل الماسكارا (دي حاجة بتتحط على الرموش عشان تتقلها وتتقل لونها - عشان الرجالة اللي زيي) ومن هنا بدأ الموضوع بدأ ياخد اتجاه تاني. بدل ما أشيل الماسكارا بالمناديل بدأت أشيلها بإيدي وأشد رموشي معاها."
"أكتر طريقة أقدر أوصف بيها اللي بيحصل لي إنه بالنسبالي بيكون زي ما بحس إني عاوزة أهرش. وبحس بإحساس مش مُريح في جسمي وبكون عاوزة الإحساس دا يروح بأي طريقة. وفي حاجة في عقلي بتقولي إن في شعرة مضايقاني ولو لقيتها وشديتها هحس إني أحسن. وفي العادة مش بتبقى شعرة واحدة، وعلى ما باخد بالي بكون شديت شعر كتير. أصحابي وعيلتي بيحاولوا يوقفوني لما بنتف شعري قُدامهم بس دا بيحسسني إني مُحرجة وخزيانة ومُحبطة ودا مش بيساعدني"
"نتف الشعر خلاني أبقى واعية بزيادة بشكلي وبشكل وشي. وبحاول طول الوقت أخبي البقع الفاضية من الشعر، فنادر لما أخرج من البيت من غير ميك أب عشان أخبّي اللي أقدر عليه. ولو معنديش رموش خالص بحس إني معنديش أي ثقة في نفسي."
طيب إيه هي أعراض المرض حسب الـ DSM5-TR؟
1- شدّ الشعر المُتكرر واللي بيتسبب في فُقدان الشعر.
2- المحاولة المُتكررة لتقليل أو توقيف شد الشعر.
3- شد الشعر بيتسبب في ضغط واضح على المريض وبيأثر على حياته سواء الاجتماعية أو في الشغل أو جوانب حياته المُهمة.
المرضى بيحسّوا بإيه قبل ما يشدوا شعرهم؟
في كذا حاجة:
ممكن يكون في مشاعر شديدة زي القلق الشديد أو الحُزن أو الغضب أو غيرها.
أوقات المريض بيحس برغبة شديدة في نتف الشعر وتوتر مصاحب ليها ولما بينتف الشعر التوتر بيقل وبيرتاح.
أوقات ناس مش بيكون عندها وعي خالص باللي بيحصل، لما بيعملوا حاجة تانية وبيركزوا فيها ينسوا نفسهم ممكن يتفاجأوا إنهم نتفوا شعر كتير بعدها.
إيه هي المناطق اللي المرضى بيشدّوا شعرهم منها؟
أكتر المناطق شُيوعًا هي: شعر الراس والحواجب والرموش. والمناطق الأقل شيوعًا هي الإبط وبقية شعر الوش والعانة. والمنطقة ممكن تختلف من وقت للتاني.
إيه هو النمط الغالب لشد الشعر؟
نتف الشعر ممكن يحصل على فترات قصيرة خلال اليوم أو ممكن يحصل على فترات مُتباعدة لكن لمدة أطول ممكن توصل لساعات.
الحاجات المُصاحبة:
80% من المرضي بيكون عندهم أمراض مُصاحبة:
زي الاكتئاب والقلق والوسواس القهري واضطراب كرب ما بعد الصدمة أو الـ PTSD و اضطراب فرط الحركة ونقص الانتباه أو الـ ADHD.
مُعظم المرضى بيبقى عندهم سلوكيات متكررة تانية تركز على الجسم أو (Body Focused Repetitive Behaviors ) زي قضم الجلد أو الضوافر أو عض الشفايف.
قد إيه المرض مُنتشر؟
1-2% من الناس عندهم اضطراب نتف الشعر. ودا كتير على فكرة. يعني مثلًا الفُصام أو الـ schizophrenia اللي إحنا بنشوفها كتير في العيادات الـ Prevalence بتاعها 0.3% على مستوى العالم. يعني 6 أضعاف عدد مرضى الفُصام تقريبًا. لكن عدد قليل هو اللي بيطلب المُساعدة عشان الإحساس بالخزي وعشان مفيش وعي عام بيه.
في ted talk جميل على يوتيوب هسيب اللينك بتاعه في المصادر لواحدة بتحكي قصتها مع الاضطراب وإزاي اتعاملت وبتتعامل معاه. لو حد حابب يسمع أكتر ممكن يشوفه.
ملاحظاتي الشخصية مع المرضى القليلين اللي شُفتهم:
بيكون في مشاكل في نمط التعلق واللي شُفته أكتر هو التجنبي أو الـ Avoidant.
بيكون في صعوبة في تنظيم المشاعر والوعي بيها.
بيكون في صدمات في الطفولة.
ولو حد عنده تعديل أو إضافة يا ريت يشاركنا.
المصادر:
DSM5-TR.