إيه هو الإنترفيو الكويس؟
هو الإنترفيو اللي المريض ميحسش إنه في إنترفيو أو قاعد مع دكتور. ميحسش إنه مُنظم. ميحسش إنه مستني الوقت يخلص عشان يقوم، ويبقى طول الوقت عاوز يكمل فيه أكتر. بالظبط شبه تجربتنا وإحنا بنتفرج على فيلم حلو. كل اللي بيشغلنا وإحنا بنتفرج إننا نكمل، قليل أوي اللي بيفكر في تركيبة القصة أو الإخراج أو التمثيل. فهو دا هدفنا في الإنترفيو (جنب تجميع المعلومات عشان التشخيص والخطة العلاجية). إن دي تكون تجربة المريض. يبقى خارج من عندنا وحاسس إنه كان في حوار جميل مش في إنترفيو، وعاوز يرجع يكمل الحوار تاني. لإن دا هو أساس بناء العلاقة العلاجية أو الـ Rapport.
الإنترفيو بالطريقة دي عمره ما هيبدو إنه مُنظم ولا مُخطط، ولا في مبادىء ونظام بيحركه. لكن النظام اللي تحت السطح هو اللي بيخلي الإنترفيو يبقى بالصورة دي. زي القصة المكتوبة حلو بتنسينا إننا بنقرأ قصة أصلًا. لكن مع كدا مفيش روائي كويس إلا وبيدرس الحبكة كويس ويعرف أساسياتها، وبيلتزم بيها مُعظم الوقت، ولما بيقرر يخرج عن المبادىء والنظام، بيكون عارف هو بيُخرج ليه. فالفترة دي هتكلم عن النظام اللي تحت السطح وبعدين هتكلم عن إزاي بنربط كل جزء بالتاني بحيث إن المريض يحس إن دا المسار الطبيعي للحوار وميحسش إنه في إنترفيو أصلًا. وبعد كدا هتكلم إمتى نُخرج عن النظام دا.
ليه نعمل نظام للإنترفيو أصلًا؟
فكرة إن يكون في نظام في دماغنا للإنترفيو، بتخلينا وقت الإنترفيو عندنا وعي إحنا فين وبنعمل إيه وعاوزين نعمل إيه الخطوة الجاية. ولو طوّلنا في مرحلة نبقى عارفين إحنا طولنا لسبب معين ولا سرحنا. يعني مثلًا المنطقة دي مهمة ومحتاجة وقت فمحتاجين نطول فيها شوية.
الحاجة التانية: إننا بنعرف برده إيه اللي مش مهم أوي فممكن نأجله أو منسألش عنه عشان حاجة تانية أهم منه.
الحاجة التالتة: إننا نتعلم الإنترفيو كله على بعضه كدا دي حاجة كبيرة وصعبة. ففكرة إن إحنا نقسمه بتسهل أوي إن إحنا نتعلم جُزء جُزء ونطبق جُزء جُزء. ونعرف بعد كدا لو إحنا عندنا نُقطة ضعف في جزء مُعين نعرف فين نُقطة ضعفنا.
الحاجة الرابعة: إن الإنترفيو لما يبقى أشبه بالحوار بيسهل تجميع المعلومات وبيزود صحة المعلومات اللي بنجمعها.
طيب إيه هو الـ Structure بتاع الإنترفيو؟ (طبعًا كل دا تقريبي ومحدش بيحسب بالدقيقة، والموضوع بيكون أرحب من إنه يتحسب بالدقيقة لكن دي مُجرد حاجة إرشادية عشان لو عندنا مشكلة كبيرة في منطقة مُعينة من الإنترفيو -يعني بناخد فيها وقت قليل أوي أو وقت كتير أوي- نقدر نعرفها ونصلحها)
أول جزء وأهم جزء من الـ structure واللي مُعظم الجُداد في التخصص (وأنا لوقت قُريب) مبيبقوش عارفين أهميته: هو الـ Chief Complaint والـ Free Speech ودا بياخد حوالي 5 لـ 8 دقايق.
تاني جُزء وتاني أهم جُزء: بيكون الـ History of Present Illness ودا اللي غالبًا وإحنا خارجين منه بنبقى واصلين لتشخيص مُعين في دماغنا، وفي آخره بنسأل عن الـ Suicide و الـ Substance use و الـ Violence لو مكنوش اتفتحوا. ودول مُهمين جدًا في الـ Risk assessment. ودا بياخد حوالي 10 لـ 20 دقيقة.
تالت جُزء بيكون الـ Past history ودا بيكون فيه الـ Past psychiatric و الـ Past medical، وأي medications المريض ماشي عليها حاليًا. ودا في المُجمل بيأكد التشخيص أو بيساعدنا فيه لكن بيساعد أكتر في إختيار العلاج. ودا حوالي 2 لـ 5 دقايق.
رابع جُزء الـ Personal history و الـ Social history و الـ Family history. ودا بيخلينا نشوف المريض بصورة أشمل، وبيخلينا نفهمه أكتر كجُزء من بيئته وبنفهم نوعًا ما هو بقى الشخص اللي قُدامنا إزاي. ودا حوالي 5 لـ 10 دقايق.
الجزء الأخير: شرح التشخيص، وعمل خطة علاجية مع المريض ودا بياخد من 5 لـ 10 دقايق.
لو جينا نحسب على الأكتر هنلاقي المجموع حوالي 50 دقيقة. لو هنحسب على الأقل وهنجمع كل الداتا دي هيبقى حوالي نُص ساعة. فهل هنقدر نعمل دا في كل إنترفيو؟
صعب جدًا طبعًا نقعد في كل إنترفيو ساعة تقريبًا، خاصةً لو إحنا معندناش وقت أو عدد المرضى كتير زي ما بيحصل في المستشفيات الحكومية، فهقول لما نيجي نوصل للنقطة دي إزاي نظبط الإنترفيو ونسيب إيه ونهتم بإيه عشان الإنترفيو ميتأثرش أوي ونقدر نعمل Rapport مع المريض وعشان على الأقل منأذيش المريض.
طيب تعالى نبدأ بأول جُزء واللي هو أهم جزء وأكتر جزء بيحصل فيه أخطاء: الـ Chief Complaint والـ Free Speech. شيي بيسميه إسم أدق هو الـ Scouting phase أو مرحلة الاستكشاف. إحنا بنستكشف المريض والمريض بيستكشفنا.
الجزء دا بيبدأ بعد ما نسأل المريض: إيه المشكلة؟ أو إيه اللي حصل عشان تيجي انهارده.
الجزء دا أهم جزء عشان هو دا أكتر جزء بنبدأ نبني فيه العلاقة العلاجية، وهو الجُزء اللي بيحدد إتجاه الإنترفيو بعد كدا. والجزء دا المريض بيستشكف فيه هل هينفع أشارك اللي بمر بيه مع الدكتور أو المعالج دا ولا لا؟ والجُزء دا هو اللي غالبًا المريض بيقرر بعده إن الدكتور أو المُعالج دا حد هيثق فيه ويكمل معاه ولا لا.
الجُزء دا المفروض المريض يتكلم فيه مُعظم الوقت، وإحنا لينا 3 مهام في الجُزء دا:
تسهيل الكلام على المريض من غير أي توجيه. وهو دا أساس الـ Rapport.
والملاحظة، ملاحظة كل حاجة: Verbal أو Non-Verbal.
والخُروج بـ areas of clinical interest، يعني بنفتكر الكلام اللي له أهمية تشخيصية أو علاجية أو بنسجله في note لو بنكنتب، يعني المريض مثلًا اتكلم في قلق أو حُزن أو هلاوس أو أعراض جسدية. إحنا بس بنفتكر في دماغنا إن المريض اتكلم في المنطقة دي، عشان هنستكشف بعد كدا كل منطقة من المناطق دي في الـ HPI.
نيجي لأهم جُزء:
إزاي نسهل الكلام على المريض؟
إن مُعظم أسئلتنا وكلامنا يبقى open-ended. ولو قدرنا وخليناه كله open-ended يبقى أحسن.
نستخدم ال facilitating gestures، زي هز الراس وال مم ، و كمل.
إن إحنا نقرأ مشاعر المريض وهو بيحكي، ونظهرله فهمنا للي هو بيُمر بيه بجُمل Empathy، إزاي نوصل فهمنا لمشاعر المريض بالـ empathy من هنا.
يعني إيه أسئلة أو جُمل open-ended ؟
أي سؤال أو جملة هتخلي المريض يتكلم ويشرح، مش مُجرد إنه يقول معلومة أو يجاوب بآه أو لأ.
الأسئلة زي:
إيه اللي حصل؟
وبعدين؟
إيه تاني؟
الجُمل:
كلمني أكتر عن كذا
الأخطاء اللي كنت بعملها في الجُزء دا وبشوف ناس كتير بتعملها: إني كنت ببدأ أسئلة Closed-ended بدري، ومبديش مساحة للـ free speech ودا بيقلل الـ Rapport وبيقلل صحة المعلومات، لإن المريض بيقول حاجات في الفترة دي ممكن عمري ما كنت هسأل عنها.
عشان طوّلت المرادي، هكمل المرة الجاية بأمثلة عن ال Free speech عشان الصورة توضح أكتر.
ويا ريت اللي عنده رأي بخصوص الـ Free Speech والـ structuring عمومًا يشاركنا بيه.
المصادر:
The First Interview, James Morrison.
Psychiatric Interviewing, Shawn Christopher Shea.