top of page

5 قواعد للتشخيص لما يكون في معلومات متناقضة:

أوقات المريض بيدينا معلومات متناقضة مع بعضها. يعني مثلًا مريضة بتقول إنها معندهاش رغبة في الأكل ومش بتاكل غير حاجات بسيطة زي الزبادي والتفاح بقالها سنتين لكن مفيش نزول في الوزن خلال السنتين دول. وأوقات تانية المريض يقولنا معلومات والأهل يقولوا معلومات مُختلفة تمامًا. وأوقات المريض يقول حاجة لكن يكون اللي ظاهر قُدامنا حاجة تانية خالص. ومش بنبقى عارفين نعمل إيه وقتها.

دي شوية مبادىء تشخيصية عشان نحل التناقض دا ونوصل لأقرب تشخيص:

  • العلامات أقوى من الأعراض أو Signs beat symptoms:

العلامات أو الـ Signs: هي ملاحظاتك عن المريض.

الأعراض أو الـ Symptoms: الشكوى بتاعة المريض.

بنقابل أوقات الناس اللي تبقى الدموع في عينيهم، وصوتهم واطي جدًا ولما نسألهم أخبار مزاجك إيه: يقول كويس الحمد لله. أو المريض اللي يبقى بيتلفت حواليه وبيقول إن مفيش هلاوس. أو المريضة اللي الـ BMI أقل من 15 ورُفيعة جدًا وتقول أنا تخينة. أو المريض اللي بيقول أنا مش قلقان بس علامات التوتر كلها ظاهرة عليه. فاللي بتلاحظه أقوى من الأعراض.


ملحوظة: الملاحظة بتتحسن مع الخبرة ومع التمرين. وإحنا بادئين بتبقى قوة ملاحظتنا على قدنا لكن مع الخبرة بتزيد.

  • الحقايق أقوى من أحاسيسك الشخصية أو Objective findings beat subjective judgements:

إحنا عقولنا مُصممة إنها تلاحظ الأنماط. فمثلًا من كتر ما بنشوف مرضى فُصام أو قلق أو اكتئاب. ممكن بس من دقيقتين كلام مع حد تحس إن في اكتئاب أو قلق أو فُصام. ومع إن الإحساس دا مهم جدًا إلا إنه مينفعش نعتمد عليه في التشخيص. هو ممكن يوجهنا إننا ندور على الأعراض. لكن لو اعتمدنا عليه لوحده احتمالية الخطأ بتزيد. يعني مثلًا شُفت مريض ال eye contact بتاعه قليل جدًا وفي عُزلة اجتماعية والعلاقات قليلة جدًا والوظيفة متأثرة ومتشخص فُصام. لكن طلع إنه مبيخرجش عشان خايف من تقييم الناس وبيقلق لما يقابل ناس جديدة لكن نفسه يعرف الناس ونفسه يقعد معاهم ودا موجود من وهو مُراهق ومفيش هلاوس ولا ضلالات وأخد Antipsychotics ومتحسنش. فكان التشخيص الأقرب هو Avoidant personality.

  • التاريخ المرضى الحديث أهم من التاريخ المرضي القديم أو Recent history beats ancient history:

أحيانًا المرضى يظهر عليهم المرض في الأول بصورة وبعدين يتحول لصورة تانية تمامًا مع الوقت. يعني مثلًا شُفت مرضى أول حاجة ظهرت عليهم هي أعرض وسواس قهري وهما في المُراهقة وبعدين الموضوع اتحول لاضطراب وُجداني ثنائي القطب أو لفُصام. فممكن حد يتصور إنه ما دام ظهر قبل كدا يبقى موجود دلوقتي وبُناءً عليه يبني الخطة العلاجية على هذا الأساس. مش شرط خالص. المرضين دول بالذات ممكن يبدأوا كوسواس قهري وبعدين صورتهم الحقيقية تظهر. فالتاريخ المرضى الحديث أهم من القديم.

  • فكّر في الأمراض الشائعة قبل ما تفكّر في النادرة أو Common is common:

مثلًا مريض عنده 25 سنة جاي يشتكي من إن صدره بيضيق ومش بيقدر ياخد نفسه وروحه بتتسحب وضربات قلبه بتزيد وبيحس إنه هيموت ودا بيقعد حوالي ربع ساعة وبيخاف إنها تجيله تاني. أول حاجة هتيجي في بالنا إن دي ممكن تكون نوبات هلع أو ممكن يكون عنده Panic disorder. وهنفكّر إن الاحتمال الأقل إنها تكون Pheochromocytoma ونحاول نستبعدها. لكن مش الأساسي إن أول حاجة تيجي على بالنا هي Pheochromocytoma إلا لو في حاجة بتشير لكدا زي ضغط بيزيد مع النوبة أو صُداع شديد مثلًا.

  • التاريخ المرضى من الأقارب بيكون أقرب للحقيقة أحيانًا:

الأساس إننا بناخد التاريخ المرضى من المريض لكن أحيانًا في الأمراض اللي بتقلل الاستبصار أو الـ Insight بيكون الأحسن إننا ندي لكلام الأقارب قوة أكبر زي مثلًا في الأطفال والمراهقين أو مرضى مشاكل الذاكرة أو الفُصام أو غيره. واللي بشوفه دايمًا إن الكلام مع الأقارب بيضيف بُعد تاني ووجهة نظر تانية حتى لو مش أقرب للحقيقة وغير كدا بيحطهم في الصورة وبيساعدوا غالبًا ومش بيبقوا ضد الخطة العلاجية لو عرفنا نكسبهم.


المصدر:

Diagnosis made easier, James Morrison


المنشورات الأخيرة

إظهار الكل

تعالى نسمع من الناس اللي بتعاني من المرض بنفسهم: "بدأت أنتف شعري وأنا عندي 12 سنة تقريبًا. وفي وقتها مكنتش حاسة أنا بعمل إيه. كنت بنتف شعري وأنا نايمة على السرير وبفكر في حاجات تانية. ولما كُنت في الإ

Post: Blog2_Post
bottom of page