top of page

إزاي نكون علاقة علاجية كويسة؟

لما بنبدأ العلاج النفسي بنبقى مُتخيلين إن شُغلانتنا شُغلانة كلام. بنبقى عاوزين نعرف العميل هيقول إيه ولما يقول إيه نرد عليه إزاي. وبيبقى تركيزنا كله على "الكلام" ومحتواه وبنبقى مُتخيلين إن الكلام هو طريقة التواصل الأساسية بين البشر أو بيننا وبين العميل.

لكن هل الكلام هو طريقتنا الأساسية في التواصل فعلًا كبشر؟

الدراسات اللي اتعملت على التواصل لقت إن 60-80% من التواصل بين البشر بيحصل بطريقة غير لفظية أو Non-verbally. يعني التواصل بالكلام عبارة عن 20-40% من التواصل بس.

أومال إيه التواصل غير اللفظي دا؟

يعني التواصل اللي بيحصل عن طريق:

  • تعابير الوش أو الـ Facial Expressions.

  • حركات الجسم أو الـ Body language.

  • الصوت ونغمته وحدته أو الـ Vocal qualities.

  • التواصل بالعين أو الـ Eye contact.

يعني ممكن انت أو العميل تقولوا حاجة لكن اللي يتفهم حاجة تانية تمامًا بسبب تعابير وش أو حركة جسم أو نغمة صوت مش متسقة مع الكلام. ولو دا حصل والكلام كان غير متسق مع الطريقة الغير-لفظية للتواصل إحنا كبشر بنصدق العلامات غير اللفظية أكتر لإنها أصدق. يعني مثلًا عميلة بتحكيلك موقف حصل مع خطيبها وبتقولك إنها احترمته أكتر في الموقف دا، لكن اللي ظهر على وشها وهي بتحكي تعابير الوش اللي بتعبّر عن القرف. هنا في حاجة غريبة محتاجة توضيح أكتر.


أو مثلًا عميل وهو بيتكلم في أول المقابلة لاحظت عليه إنه بيهز رجله كتير وبيتجنب النظر في عينك وبيلمس وشه كتير وهو بيتكلم وصوته واطي شوية (علامات غير لفظية ممكن تدل على القلق). هنا ممكن تطمنه بإنك تقول مثلًا: "شكلك قلقان ودا طبيعي جدًا في الأول، كلنا بنقلق لما بنتكلم مع حد غريب في الأول خاصةً في مشاكل شخصية كمان".


بعد حاجة زي كدا ممكن يرتاح أكتر والدنيا تمشي أسهل عليك وعليه. وهنا أهمية التواصل غير اللفظي. فلو إحنا مأخدناش بالنا منه ممكن يفوتنا حاجات كتير مهمة ممكن تساعد العميل وتساعدنا في مساعدته.


إيه علاقة التواصل غير اللفظي أو الـ Non-verbal behavior دا بالعلاقة العلاجية؟ (ممكن تفوت الكلام دا لو انت معندكش خلفية عن العلاقة العلاجية وتكمل من السؤال اللي بعده)

أنا عارف إن الناس اللي عندها خلفية عن العلاقة العلاجية هتبقى متوقعة كلام عن التقبل غير المشروط أو الـ Unconditional positive regard والتعاطف أو الـ Empathy والاتساق أو الـ Congruence. كل دا مهم جدًا وهتكلم عنه إن شاء الله. لكن أعتقد الأساس اللي بيسبق كل دول وأساس العلاقة العلاجية هو الملاحظة أو الـ Observation والحضور أو الـ Attending behavior. ودول بيخلونا حاضرين مع العميل ومنتبهين لكلامه ولتعابير وشه وحركات جسمه ونغمة صوته. أعتقد لو انت مش حاضر ومنتبه لكل دول مش هتقدر تفهم العميل كويس ولو مفهمتش العميل كويس مش هتقدر تتعاطف معاه كويس ولو مقدرتش تتعاطف معاه كويس مش هتقدر تتقبله كويس ولو مقدرتش تتقبله كويس مش هتكون متسق معاه ومش هتقدر تعبّر عن الاتساق دا. فالعلاقة العلاجية مش هتكون قوية كفاية ومش هتكون في أحسن أحوالها.


التواصل غير اللفظي دا هيساعدنا إزاي في بناء العلاقة العلاجية؟

بطريقتين:

  • الطريقة الأولى: هي إننا نلاحظ السلوك غير اللفظي للعميل عشان دا بيساعدنا كتير في قراية مشاعره أو بيورينا حاجات ممكن العميل ميكونش مستعد يتكلم فيها. فبنشوفه بصورة أعمق. ودي حاجة اسمها الـ Observation.

  • الطريقة الثانية: إن العميل يشوف إننا مهتمين نسمعه عن طريق لغة جسمنا وفي نغمة صوتنا وتعابير وشنا ونظرات عينينا ودي حاجة اسمها الـ Attending Behavior.


هتكلم الأول عن الطريقة الأولى: اللي هي الملاحظة أو الـ Observation:

وهتكلم عن

  • إيه اللي هنحاول نلاحظه إجمالًا.

  • بعدين هوضح إيه هي العلامات الغير لفظية اللي بتظهر مع المشاعر لإنها من أهم مكونات التواصل بين البشر عمومًا.

إجمالًا كدا:

تعابير الوش أو الـ Facial Expressions:

ليه تعابير الوش مهمة؟

تعابير الوش بتعبّر عن مشاعرنا لا إراديًا. فمن الحاجات اللي لما بنبدأ نلاحظها بتساعدنا كتير جدًا سواء:

  • لاحظنا تعبير وش وكان مناسب نتكلم عنه يعني مثلًا شُفنا تعابير وش خوف أو حُزن وقُلنا للعميل شكل دا مزعلك أو مخوفك بتفرق كتير جدًا.

  • أو لاحظنا تعبير وش لكن مينفعش نتكلم عنه في وقتها. بيخلينا نفهم العميل أكتر حتى لو مكنش مناسب نوضح فهمنا دا.

حركات الجسم أو الـ Body language:

في أساطير كتير مشهورة عن لغة الجسد وإن مثلًا ممكن تقرأ حد من لغة جسده بس. يعني مثلًا من الحاجات المشهورة إنه لو حد لمس مناخيره وهو بيتكلم يبقى بيكدب. دا مش صح خالص. لمس المناخير دا معناه إنه ممكن يكون علامة على زيادة القلق وزيادة القلق ليها كذا تفسير. فالتفسير هيعتمد على محتوى الكلام وبقية التواصل غير اللفظي مثلًا. وفي الأول والآخر هو احتمال مش حقيقة.

في 4 قواعد ممكن يفهمونا أكتر إزاي نقرأ حركات الجسم:

  • لاحظ السياق: يعني مثلًا من الحاجات المشهورة إن حد مشبك إيده قُدام صدره يبقى في وضع دفاعي ورافض الكلام اللي بيتقاله. لكن لو الدنيا برد وهو عامل ممكن يكون بيحاول يدفي نفسه.

  • لاحظ الحركة متطابقة مع بقية وسائل التواصل ولا لا: يعني مثلًا شُفت مريضة بتقول إنها مش بتخاف من جوزها، لكن قبل ما تتكلم كل مرة بتبصله عشان يديها الإذن وبعد ما تتكلم تبصله عشان تشوف أثر كلامها عليه.

  • لاحظ السلسلة كلها: يعني كل حركة عاملة زي حلقة من سلسلة، مينفعش تاخد حركة لوحدها وتقول دي معناها كذا. شوف السلسلة كلها بتقول إيه في الآخر.

  • لاحظ الحركات الفردية: زي ما في حركات عالمية كل واحد مننا له حركات مميزة بتظهر في أوقات مُعينة يعني في مريضة مثلًا لما بتقلق في عضلة جنب مناخيرها بترتعش، فلما أشوف الحركة دي يبقى احتمال كبير إنها تكون قلقانة دلوقتي.


هفوت دلوقتي كلام عن نغمة الصوت والتواصل بالعين عشان مطولش وندخل على إيه الحاجات الغير لفظية اللي ممكن نلاحظها على المشاعر وهبدأ بالحُزن:

إيه هو الحُزن؟

  • إحنا بنحزن لما نفقد شخص مُهم أو حاجة مهمة. يعني مثلًا مرض أو موت حد عزيز علينا.

  • لما نفقد جُزء من هويتنا (خاصةً في الفترات الانتقالية زي النقل من بيت لبيت أو من شُغل لشغل أو من مرحلة عمرية لمرحلة عُمرية تانية).

  • لما نكون متوقعين حاجة ومتحصلش (زي مثلًا مستنيين هدية من حد قريب وميجيبش، أو مستنيين ترقية في الشغل ومتحصلش.

  • لما نفكر في أي حاجة من اللي فوق دول أو نستعيد الذكريات اللي حصلت أو نتخيل إن حاجة منهم هتحصل. (الأفكار التلقائية في العلاج المعرفي السلوكي)

إيه هي فايدة الحُزن؟

  • إنه إشارة إننا محتاجين مساعدة أو تعزية.

  • أو إننا محتاجين وقت لينا نستعيد فيه نفسنا بعد الفقد.

الحزن بيظهر إزاي على تعابير وشنا؟




  • كلنا عارفين إن لما يكون حد زعلان شفايفه بتبقى عاملة حرف U مقلوب، أو الجانبين بتوع الفم بيتشدوا لتحت.

  • الحاجة اللي مش مشهورة ومبنعرفش نخبيها: الجزئين الداخليين من الحواجب بيترفعوا.

  • الحاجة التالتة: الجفن بينزل شوية والعينين ممكن يبصوا لتحت.

بيظهر إزاي على حركات جسمنا؟

  • الضهر بيتحني شوية وحركتنا بتبقى أبطء شوية.

بيظهر إزاي على صوتنا؟

  • الصوت بيوطى وبيبقى أنعم.

لو عاوز تعرف أكتر عن التواصل غير اللفظي ممكن تبص على أول كتاب في المصادر ولو عاوز تعرف أكتر عن المشاعر ممكن تبص أكتر على تاني كتاب وآخر كتاب عن لغة الجسد.

لو حد له أي إضافة أو تعديل يا ريت يشاركنا.

المصادر:

Intentional Interviewing and Counseling by Allen Ivey.

Emotions revealed by Paul Ekman.

The Definitive book of body language by Allan Pease.


المنشورات الأخيرة

إظهار الكل
Post: Blog2_Post
bottom of page