top of page

إزاي نحط خطة علاجية للانتحار بدرجات خطورته؟

أعتقد في 4 احتمالات بيكونوا موجودين بعد ما بنقعد مع المريض اللي عنده أفكار أو خطط أو محاولات انتحار (الانتحار مش إيذاء النفس أو الـ Self-harm). ودا ترتيبهم في الخطورة:

  • المريض عنده نية للانتحار ولو سبناه يمشي ممكن ينتحر.

  • المريض متردد أو Ambivalent وفي أسباب عاوز ينتحر عشانها وأسباب عاوز يعيش عشانها.

  • المريض مع إن عنده أفكار انتحارية شديدة إلا إنه متضايق منها ومتضايق من رغبته في الانتحار ومفيش عنده نية إنه ينتحر وعاوز يخلص من الرغبة والأفكار.

  • المريض عنده أفكار انتحارية ومفيش عنده خطط ولا حاول ينتحر قبل كدا والأفكار بسيطة بتيجي كل فترة كبيرة ومش عاملة مشكلة ولا بتشكل خطورة.

هتكلم انهارده عن:

  • إيه المؤشرات اللي بتدل على إن المريض دا لو سبناه يمشي ممكن ينتحر.

  • إيه الخطة العلاجية بتاعته.

إيه هي المؤشرات؟

دا الرُباعي القاتل أو الـ Tetrad of Lethality زي ما شيي بسيميه:

  • وجود هلاوس آمرة بالانتحار.

  • المريض قالك خلال الإنترفيو إنه ناوي ينتحر لما يمشي.

  • المريض اللي بينكر بشدة وجود أي أفكار انتحارية مع وجود عوامل خطورة كتير.

  • محاولة انتحار قريبة خطيرة.

طيب إزاي نقول إن المحاولة اللي حصلت دي خطيرة أو لا؟

في نوعين من الخطورة:

  • الخطورة الجسدية.

  • الخطورة النفسية.

يعني إيه خطورة جسدية؟

يعني المحاولة كانت خطيرة فعلًا جسديًا وممكن تموت أو المريض مُتخيل إنها ممكن تموت زي مثلًا:

  • بلع أقراص كتير والأقراص دي معروف إنها ممكن تموت أو المريض مُتخيل إنها ممكن تموت.

  • استخدام السكين في أماكن معروف إنها ممكن تموت أو برده المريض مُتخيل إنها ممكن تموت.

  • النط من مكان عالي ممكن يموت.

طيب يعني إيه خطورة نفسية؟

يعني المريض عمل حاجات تقول إنه كان عاوز يموت فعلًا بالمحاولة دي أو كان مخطط إنه يموت فعلًا زي:

  • إن المريض بعت رسالة لحد أو كلم حد يودعه قبل ما يعمل المحاولة.

  • إنه عمل المحاولة في مكان ووقت عارف إن محدش هيكون موجود فيه عشان محدش يقدر ينقذه.

  • مطلبش أي مساعدة بعد ما حاول ينتحر ولا كلم أي حد والموضوع اُكتشف بالصدفة.

  • إنه يكون عنده ندم إنه عاش بعد المحاولة أو إن حد أنقذه.

نعمل إيه لو المؤشرات دي موجودة؟

المريض دا محتاج يتحجز في مستشفى لإنه عالي الخطورة وممكن ينتحر لو مشي.


نعمل إيه مع المريض لما نحجزه في المستشفى؟

  • المريض بيكون تحت ملاحظة لصيقة وبننبه على التمريض أو الإشراف إن لازم يكون في حد جنبه 24 ساعة وميتسبش لوحده.

  • أي حاجة جوا المستشفى ممكن تُستخدم في الانتحار لازم تتشال. مُعظم المستشفيات بتعمل حساب عوامل الأمان والمجلس القومي للصحة النفسية بيراقب وبيشترط وجود عوامل الأمان دي في أي مستشفى، لكن في حاجات زيادة. هقول أمثلة حاجات استخدمت قبل كدا جوا المستشفيات عشان الناس تاخد بالها: الملايات والمفاتيح والولاعات وأحيانًا الكوبايات لو اتنست بالخطأ.

  • الأدوية والعلاجات النفسية اللي بتقلل خطورة الانتحار: الكلوزابين (Clozapine) في مرضى الـ Schizophrenia. الليثيوم (Lithium) في مرضى الـ Bipolar. الـ Antidepressants في مرضى الـ Depression (فكرة إن الـ Antidepressants بتزود احتمالية الانتحار، دي rare وغالبًا في الناس اللي سنهم صُغير وكمان هيكون موجود في المستشفى وتحت الملاحظة اللصيقة، ولو مريض severe depression ومعاه رغبة شديدة في الانتحار ممكن نعمل augmentation من البداية بـ Antipsychotic أو mood stabilizer زي الـ Prianil ودا بيقلل الـ Impulsivity)

  • الـ ECT مهم جدًا ومن الحاجات الكويسة جدًا في الـ High risk suicide لو مفيش استجابة للعلاج وفي ناس بتاخد الخطوة دي من الأول.

  • المريض هيحتاج دعم وخطة للخروج بعد ما الأفكار تهدي والحالة تستقر والخطورة تقل.


ملحوظة: في مؤشرات كتير عشان تقيس خطورة الانتحار. أهمهم دلوقتي طريقة اسمها الـ CAMS Approach وفيها جُزء لتقييم الخطورة بملىء استمارة اسمها SSF. بس فكرة إننا نملى استمارة أو نكتب عمومًا وإحنا بنتكلم مع المريض في الانتحار أو المريض يملاها بنفسه شيي بيقول إن خبرته في الموضوع إنها حاجة مش reliable ولا يُعتمد عليها عشان ممكن يفوتنا حاجات كتير من الـ non-verbal behavior وإننا نبقى مع المريض أهم من ملىء استمارات. أنا متفق معاه. بس لو حد جرّب الـ SSF أو له خبرة معاها يا ريت يشاركنا.


ولو في أي حد عنده تعديل أو إضافة يا ريت يشاركنا.

والمرة الجاية هتكلم عن الخطة العلاجية لبقية الاحتمالات إن شاء الله.

المصادر:

Psychiatric Interviewing,Shawn Christopher Shea.

The First Interview, James Morrison.


المنشورات الأخيرة

إظهار الكل

في المكان الذي أتيت منه.. عندما يسأل أحدنا سؤالًا مثيرًا ننحني له. جوستيان جاردر الأسئلة سلاح ذو حدين. ممكن تبقى هي الأنسب في وقت مُعين ومع مريض مُعين وممكن تبقى أكتر حاجة مُعطلة في وقت تاني ومع حد تا

Post: Blog2_Post
bottom of page