top of page

إزاي أقاطع المريض بطريقة لطيفة؟


أعتقد مُعظمنا قابل المريض أو الأهل اللي مش بيبطلوا كلام، وكتير مننا مبيبقاش عاوز يحرجهم أو يقاطعهم وفي ناس بخليهم يسكتوا بصورة مش لطيفة. أنا كنت من الناس اللي مبتبقاش عاوزة تقاطع الأهل ولا المريض حتى لو بيتكلم كتير وفي كلام مش مفيد، عشان كُنت مُتخيل إن دي قلة ذوق. لكن لقيت إني في آخر الإنترفيو مش بطلع بمعلومات كفاية عن المريض ودا مش بيساعده في النهاية، حتى لو تخيلت إني "مكنتش قليل الذوق" معاه. فتعالى نشوف مع بعض ممكن نعمل إيه مع المريض أو الأهل اللي بيتكلموا كتير في كلام مش مُفيد.


أولًا: إيه هي طبيعة المرضى اللي بيتكلموا كتير؟

النوع الأكثر شيوعًا من المرضى اللي بيتكلموا كتير هما مرضى القلق. وفي نوعين تانيين هما المرضى اللي عندهم histrionic traits والمرضى اللي عندهم hypomania أو mania.


إيه اللي بيحصل لو اتعاملنا مع المرضى دول زي ما بنتعامل مع أي مريض تاني؟ يعني لو سألنا أسئلة open-ended كتير وقُلنا empathy statements كتير وعملنا ال facilitating gestures زي هز الراس والتشجيع على الكلام عشان نزود ال rapport؟


لما بنعمل كدا المريض بيتخيل إن كلامه الغير مُفيد مهم وبيزود الكلام، وهنلاقي نفسنا عدينا النص ساعة أو الساعة ومطلعناش بحاجة. فإحنا بيكون لينا دور في إننا نزود الموضوع. طيب نتعامل إزاي؟


في بداية الإنترفيو، كدا كدا بنسأل سؤال مفتوح، اللي هو مثلًا"إيه هي المشكلة؟" أو "إيه اللي حصل عشان تيجي انهارده؟" فدي حاجة أساسية مش هنقدر نستغنى عنها. وهنسيب المريض يتكلم في الأول شوية، عشان يحس إنه قال شوية من اللي عنده من غير مقاطعة، وهنا بنستخدم ال facilitating gestures عادي زي هز الراس وال empathy statement وكل حاجة. لكن بعد شوية هنلاقي المريض بدأ يبقى كلامه كتير ومش مُفيد، ومش عارفين حتى نتأكد من وجود criteria المرض، ومش عارفين نعمل differential diagnosis ولا ناخد تاريخ مرضى كويس. فهنا هنبدأ نعمل الآتي:

  • هنقلل ال open-ended questions وهنقلل ال empathy statements لإن نتيجتها مع المريض دا هتزود الكلام أكتر وإحنا مش عاوزين كدا دلوقتي.

  • هنبدأ نقلل أي حاجة إحنا بنعملها المريض ممكن يفهم منها إن إحنا عاوزينه يتكلم أكتر، زي ال facilitating gestures وهنوقف الكتابة في النوتس (لو انت بتكتب) لإن المريض برده بيتخيل إن كلامه مهم، بما إنك حريص على كتابة الكلام.

  • هنبدأ نسأل أسئلة closed-ended، زي مثلًا" قولي بتنام كام ساعة في اليوم خلال الأسبوعين اللي فاتوا؟" "هل لاحظت إنك بقيت محتاج تصرف فلوس أكتر" "حسيت إن الناس بيعاملوك بمعاملة أقل من اللي تستحقها؟".

  • لو المريض برده لسه بيُخرج برا الموضوع، ممكن تبدأ تستخدم جُملة زي كدا: "خلينا نرجع لموضوع النوم، كنت بتنام كام ساعة في اليوم خلال الأسبوعين اللي فاتوا؟"

  • لو لقيت المريض لسه بيخُرج برا الموضوع، ممكن تقاطعه هنا وسط الكلام - دي بتبقى صعبة في الأول لو انت مش متعود تعمل دا في العادي، لكن مع الوقت هتتعود- وتقول حاجة زي كدا:"معلش هقاطعك، بس خلينا دلوقتي نركز على كذا …"، في تكنيك ألطف شوية وشيا بيسميه ال piggyback، وهنا بتقول للمريض empathy statement وبعدها closed-ended question. يعني مثلًا:

كنتي حاسة إنك حزينة الفترة اللي فاتت؟

حصل حاجات كتير في الشهور اللي فاتت وكنت متضايقة من زن ماما والمصاريف اللي محتاجة تدفع بالظبط زي ما كانت قاعدة مع عمتي بس لحسن الحظ علاقتي بعمتي أحسن من علاقتي بماما..

شكلك كنتي مضغوطة الفترة اللي فاتت، هل كنتي حزينة الأسبوعين اللي فاتوا؟ (empathic statement followed by closed-ended question)

أيوة كنت مكتئبة جدًا.


  • في تكنيك تاني لطيف برده: نفترض إنك سألت المريض عن إحساسه إن عنده طاقة كبيرة وبدأ يتكلم في التفاصيل وإن عنده مشروعات كتير يعملها وخرج من دا على إن له واحد صاحبه عاوز يعمل معاه مشروع كويس. فهنا هتقاطع لإنه بدأ يخرج عن المسار وهتقوله مثلًا: "قبل ما نتكلم في بقية المشاريع، عاوز أعرف أخبار نومك إيه؟"، فبجُملة "قبل ما نتكلم" عرفته إنك متجاهلتش اللي بيتكلم فيه وقلتله إن إحنا ممكن نرجعله بعدين.

  • طيب، لو كل دا منفعش والمريض لسه بيتكلم كتير- ودا هيكون قليل لو استخدمت الطُرق دي- هتقول "عشان وقتنا محدود، خلينا نركز على المشاكل الأهم دلوقتي زي كذا وكذا …"


أول ما بدأت أستخدم الطُرُق دي مع المرضى أو الأهل اللي بيتكلموا كتير في كلام مش مُفيد بقيت بخلص ال interview أسرع وبخرج بداتا أكتر ومش بأثّر على ال rapport زي ما كنت متخيل، يعني مرة الموقف دا حصل معايا:

مريضة كانت في hypomania وكنت كل شوية أقولها "معلش هقاطعك، خلينا نتكلم في كذا.."

بعد حوالي 4 مقاطعات قالتلي قاطعني يا دكتور من غير ما تعتذر أنا عاوزة أقول كل حاجة عشان مش عارفة إيه المهم وإيه اللي مش مهم.


شيا بيقول إن في أخطاء شائعة بيلاحظها بتتعمل مع المريض دا وهي:

  • الخوف من مُقاطعة المريض. لإن المُقاطعات لما تتعمل بطريقة كويسة مُعظم المرضى مبيكونش عندهم مشكلة معاها.

  • المُقاطعة بدري خلال البداية، لإن هنا لازم تسيب المريض يتكلم حتى لو هيقول كلام مش مهم عشان تفهم المريض أكتر وعشان ال rapport.

  • المُقاطعة بحزم من غير استخدام الأساليب اللطيفة الأول، لإن المفروض نتدرج في الحزم مع المريض.

يا ريت تقولوا لنا تجاربكم مع المريض اللي بيتكلم كتير، ولو ليكم أسلوب مُعين بتحبوا تستخدموه يا ريت تعرفونا. وتعرفونا نتيجته.

المصدر:

Psychiatric Interviewing by Shawn Christopher Shea


المنشورات الأخيرة

إظهار الكل

في المكان الذي أتيت منه.. عندما يسأل أحدنا سؤالًا مثيرًا ننحني له. جوستيان جاردر الأسئلة سلاح ذو حدين. ممكن تبقى هي الأنسب في وقت مُعين ومع مريض مُعين وممكن تبقى أكتر حاجة مُعطلة في وقت تاني ومع حد تا

Post: Blog2_Post
bottom of page