top of page

أساسيات وأخطاء شائعة في تشخيص الاكتئاب

أولًا: إيه هي نوبة الاكتئاب؟

خمس أعراض من الجايين على الأقل، ولازم واحد من الأعراض دول يكون من أول اتنين. والأعراض دي تستمر لمدة أسبوعين على الأقل مُعظم اليوم ومُعظم أيام الأسبوع.


الأعراض دي:

  1. حُزن

  2. قلة الاستمتاع بالأنشطة اللي كان الشخص بيعملها أو فُقدان الاستمتاع بيها تمامًا زي حد كان بيحب يلعب كورة مثلًا ومبقاش يستمتع بيها دلوقتي.

  3. فُقدان الشهية أو الشهية تكون مفتوحة بزيادة أو فُقدان الوزن أو زيادة في الوزن.

  4. أرق أو نوم كتير.

  5. قلة التركيز وقلة القُدرة على اتخاذ القرار.

  6. بطء في الحركة أو زيادة في الحركة (Psychomotor agitation or retardation)

  7. الإحساس بالإجهاد المستمر أو قلة النشاط.

  8. الإحساس بانعدام القيمة أو الإحساس بالذنب الشديد.

  9. أفكار أو خطط عن الانتحار أو محاولات انتحار.


حد جاي بالأعراض دي أول حاجة نستبعدها إيه؟

  • لازم نستبعد حدوث أعراض نوبة هوس (mania) أو hypomania زي إننا نسأل عن وجود أي أعراض لحركة زايدة أو نشاط زايد أو تسارع في الأفكار أو عدم الحاجة للنوم أو إحساس سابق بالعظمة. ليه؟

  • عشان دي هيغير التشخيص إلى Bipolar depression وهيغير العلاج تمامًا، ولو إدينا للمريض دا مضاد اكتئاب كدا لوحده ممكن يدخل في نوبة هوس (Mania)


إيه تاني نستبعده؟

  • لازم نستبعد أي medical condition والأشهر هي قلة نشاط الغُدة الدرقية (Hypothyroidism) ونستبعد دا بأسئلة زي: حساسية زايدة للبرد أو الإمساك. ونعمل تحليل غدة درقية.


إيه تاني نستبعده؟

  • استخدام أي مُخدرات: الأشهر في المُخدرات بيكون خلال أعراض الإنسحاب: زي أعراض إنسحاب الكوكايين والمنشطات زي الـ methamphetamine أو الكريستال.

  • استخدام أي أدوية: والأشهر هو الكورتيزون، وبيعمل أعراض اكتئاب لما بيتاخد بجُرعات عالية وأحيانًا Psychosis.


إيه تاني مهم نسأل عنه؟

لازم نسأل عن وجود أي هلاوس أو ضلالات (hallucinations or delusion) عشان المريض بيكون مكسوف جدًا يتكلم في حاجة زي كدا، وبنسأل حتى لو المريض مفتحش الموضوع باستخدام الـ normalization technique عشان المريض ميحسش بالغُربة. ليه؟

برده عشان هيخلي إختيار العلاج مُختلف وهنحتاج نزود Antipsychotics.


لازم ناخد بالنا من المدة، ليه؟

لو أعراض الاكتئاب مستمرة لمدة سنتين أو أكتر والشخص طول السنتين الأعراض مختفتش لمدة أكتر من شهرين يبقى التشخيص: Persistent depressive disorder أو Dysthymia وكان بيتقال عليهم Depressive personality.


طيب دا مهم ليه؟

عشان الـ Prognosis أو احتمال التحسن: يعني احتمالات التحسن هنا بتكون أقل من الاكتئاب العادي مثلًا من 13-20%.


بنسأل نفسنا برده: هل الأعراض حصلت نتيجة وفاة حد عزيز على المريض أو فُقدان شخص مهم. ليه؟

عشان ممكن يكون حُزن طبيعي أو normal bereavement. طيب نفرق بينهم إزاي؟


في الحُزن العادي نتيجة فُقدان حد عزيز:

  • الحُزن بيقل مع الوقت لكن مع الاكتئاب الحُزن بيزيد.

  • الحُزن هنا بيكون ناتج عن التفكير في المتوفي أما في الاكتئاب بيبقى الأساس أفكار انتقادية للنفس.

  • في الحُزن العادي، الشخص بيظل مُحفتظ بصورته عن قيمته أو الـ self-esteem أما في الاكتئاب بيكون في إحساس بانعدام القيمة.

  • لو الشخص هنا فكر في الموت فبيفكر إنه يحصّل المتوفي أما في الاكتئاب بتكون تفكير في الانتحار لانعدام الأمل وانعدام القيمة أو عدم القدرة على احتمال ألم الاكتئاب.


هتفرق في إيه؟

إن الحُزن العادي بياخد وقته وبيعدي لوحده، ومش بيحتاج علاج. والحُزن هنا طبيعي جدًا وبيخلي الناس حوالين الشخص الطبيعي يقفوا جنبه ويساندوه ولو إدينا مضادات اكتئاب ممكن نأخر العملية دي.



مهم نعرف برده: هل الأعراض دي حصلت نتيجة ضغط مُعين (Stressor). ليه؟

عشان لو نتيجة Stressor ممكن يكون Adjustment disorder، وهنا الأعراض مش بتكون مكملة نوبة الاكتئاب، والحُزن هنا بيكون مُتعلق غالبًا بالتفكير أو التعرض للمشكلة أو الـ stressor ومش pervasive أو شامل زي الاكتئاب.


طيب دا ليه مهم؟

عشان هنا العلاج الأساسي مش دوائي والأساس هو ال psychotherapy.


لو حد عنده تعديل أو إضافة يا ريت يشاركنا.


المصادر:

Diagnosis Made Easier, James Morrison.

Oxford Handbook of psychiatry.


المنشورات الأخيرة

إظهار الكل

تعالى نسمع من الناس اللي بتعاني من المرض بنفسهم: "بدأت أنتف شعري وأنا عندي 12 سنة تقريبًا. وفي وقتها مكنتش حاسة أنا بعمل إيه. كنت بنتف شعري وأنا نايمة على السرير وبفكر في حاجات تانية. ولما كُنت في الإ

Post: Blog2_Post
bottom of page