top of page

أبدأ أتعلم العلاج النفسي أو الـ Psychotherapy إزاي ومنين؟

كلنا بنبقى في حيرة أول ما نيجي نتعلم حاجة جديدة خاصةً لما تكون كبيرة وفيها آراء كتير ومدارس كتير زي العلاج النفسي. وحتى بعد ما بنبدأ نتعلم مدرسة مُعينة بنسأل نفسنا:

  • هي المدرسة اللي أنا اتعلمتها دي كويسة ولا في حاجة أحسن؟

  • هو إيه اللي ممكن يفيدني تاني؟

عشان نجاوب على الأسئلة دي بيكون قُدامنا كذا طريقة:

  • نسأل الناس اللي أكبر مننا وأقدم مننا ونتعلم من خبرتهم.

  • ندور في الأبحاث المعمولة على العلاجات والمدارس النفسية ونشوف أنهي أحسن وإيه اللي هيساعد المريض أكتر.

دلوقتي هحاول أجاوب على الأسئلة دي من خلال الـ research اللي قرأته وهضيف في الآخر اللي اتعلمته من خبرتي (اللي هي قليلة جدًا مقارنةً بزملاء كتير هنا) وهستنى من الزملاء يشاركونا بخبراتهم:

  • إيه هي أحسن مدرسة علاجية بُناءً على نتايجها أو تحسن المرضى عليها؟

  • إيه اللي بيخلي المرضى يتحسنوا فعلًا؟

  • هل في تكنيك علاجي مُعين أحسن من غيره (بغض النظر عن المدرسة العلاجية)؟

  • إيه أكتر حاجة المرضى بيشوفوا إنها بتساعد في العلاج النفسي وإيه الحاجات اللي بتضايقهم؟

  • المريض بيحتاج قد إيه جلسات عشان يتحسن؟

  • قد إيه من المرضى بيتحسنوا بالعلاج النفسي؟ وإيه نتايجه مُقارنةً بالعلاج الدوائي؟

  • إيه هي أفضل طريقة نتعلم بيها ونطبق بيها العلاج النفسي؟

إيه هي أحسن مدرسة علاجية بُناءً على تحسن المرضى عليها؟

  • مفيش مدرسة علاجية أحسن من التانية في النتيجة ومفيش فروق تُذكر في تحسن المرضى.

  • الظاهرة دي اتسمت Dodo bird effect أو ظاهرة طائر الدودو: ودي شخصية في رواية أليس في بلاد العجائب كانت بتقول: "الكل كسب والكل لازم ياخد جوايز."

إزاي دا بيحصل مع إن في اختلافات بين المدارس في النظريات وفي الطريقة؟

  • في نظرية بتفسر الظاهرة دي اسمها نظرية العوامل المشتركة أو الـ Common factors theory، وبتقول إن التغيرات اللي بتحصل بالعلاج النفسي بتحصل نتيجة لعوامل مُشتركة موجودة في كل المدارس لكن العوامل دي ممكن متتلاحظش مع إنها ممكن تكون السبب الرئيسي في التغيير أو التحسن.

إيه هي العوامل المشتركة دي؟

  • العلاقة العلاجية ما بين المُعالج والمريض.

  • صفات المريض.

  • صفات المُعالج.

  • تأثير البلاسيبو أو الـ Placebo effect.

  • عوامل خارجية عن العلاج النفسي.

ومن بين كل دول مُعظم الدراسات (وحتى من خبرة المعالجين) بتقول إن العلاقة العلاجية من أهم العوامل. فهبقى أتكلم عنها في الآخر.

هل في تكنيك مُعين أحسن من غيره؟

  • في تكنيكات مُعينة بتؤدي لتحسن فعلًا وفي تكنيكات مُعينة بتحسن العلاقة العلاجية أو التحالف العلاجي.

  • لكن عمومًا التكنيكات المُحددة والمدرسة نفسها دورها صُغير في التحسن.

  • في بعض الدراسات بتقول في تكنيكات مُعينة من العلاج المعرفي السلوكي أحسن بعينها زي التعرض ومنع الاستجابة مثلًا في أمراض القلق.

  • بالنسبة للـ psychodynamic : الـ Interpretations المظبوطة اللي بتحصل بعد تكوين علاقة علاجية قوية ليها تأثير كويس وبالأخص الـ transference interpretations لكن بُجرعات متوسطة مش كتيرة.

إيه أكتر حاجة المرضى بيشوفوا إنها بتساعد في العلاج النفسي وإيه الحاجات اللي بتضايقهم؟ (نخلي بالنا إن في اختلافات ثقافية والأبحاث دي معمولة برا مش هنا)

  • المرضى بيعلقوا أكتر على الحاجات اللي ليها علاقة بالعلاقة العلاجية أكتر من التكنيكات المُعينة زي مثلًا: "المعالج كان مُهتم وودود".

  • المرضى بيتضايقوا من إعطاء النصائح المباشرة: زي إعمل كذا.

قد إيه من المرضى بيتحسنوا بالعلاج النفسي؟ وإيه نتايجه مُقارنةً بالعلاج الدوائي؟ (عشان توقعاتنا من المرضى تكون واقعية)

  • نتايج العلاج النفسي تساوي تقريبًا نتايج العلاج الدوائي وأحيانًا أحسن.

  • التحسن الناتج عن العلاج النفسي ممكن يستمر سنين بعد انتهاء الجلسات.

  • حوالي 20-40% من المرضى مش بيتحسنوا بالعلاج النفسي.

  • حوالي 5-10% من المرضى حالتهم بتسوء.

المريض بيحتاج قد إيه جلسات عشان يتحسن؟ (برده عشان توقعاتنا من المرضى تكون واقعية)

  • طبعًا حسب المرض وحسب المريض، لكن عمومًا الأعراض والتغيرات السلوكية بتاخد وقت أقل من اضطرابات الشخصية والمشاكل الـ interpersonal.

  • حوالي 50% من المرضى بيتحسنوا بعد 20 جلسة.

  • حوالي 75% من المرضى بيتحسنوا بعد 50 جلسة.

إيه أفضل طريقة أتعلم بيها وأطبق بيها العلاج النفسي؟

في 4 طُرق ممكن تختار منهم:

  • الطريقة الأولى: استخدام نوع واحد من العلاج النفسي والطريقة دي اسمها Monism أو الـ Purism: واللي بيستخدموا الطريقة دي شايفين إن كل مرض وكل مشكلة ليها مدرسة مُعينة هتكون أحسن من غيرها في حل المرض أو المشكلة دي، استنادًا على الأبحاث أو الخبرة: زي مثلًا العلاج المعرفي السلوكي للوسواس القهري.

  • الطريقة التانية: التعددية أو الـ Pluralism: استخدام المدراس المختلفة بنظرياتهم وتكنيكاتهم مع بعض والطريقة دي اسمها التعددية أو الـ Pluralism: ودول بيقدروا وجهات النظر المختلفة للمدارس وبيحاولوا يجمعوا بينهم.

  • الطريقة التالتة: الانتقائية أو الـ Eclecticism: استخدام تكنيكات مُختلفة (من غير نظريات) ودول مش بيستخدوا أي نظريات من أي مدارس. ودول براجماتيين جدًا. من الآخر اللي تكسب بيه العب بيه.

  • الطريقة الرابعة: التكاملية أو الـ Integrative: ودول بيشوفوا إن العوامل المشتركة أو الـ common factors مهمين جدًا وبيهتموا بيها. وشايفين إنهم ممكن يستخدموا تكنيك من مدرسة علاجية تانية لو التكنيك دا كويس. وممكن يوفقوا بين نظريات لو ينفع التوفيق بينها. فالطريقة دي حاجة بين التعددية والانتقائية. ودي أكتر طريقة أنا بفضلها.

أبدأ أتعلم إزاي بقى؟

ممكن دلوقتي تحس إنك تُهت. بس كنت بتكلم في التفاصيل دي عشان تقدر تشوف الصورة الكبيرة وبعد كدا تختار انت براحتك حسب اللي يناسبك. عشان ممكن اللي أقترحه ميكونش مناسب ليك.

اللي هقوله دا رأيي:

  • أول حاجة وأهم حاجة تتعلمها هي العلاقة العلاجية ليه؟

هي دي الأساس اللي هتبني عليه أي حاجة هتتعلمها بعد كدا، ومهما كانت المدرسة بتاعتك انت شايف إنها كويسة وجميلة، لو مفيش علاقة علاجية كويسة بينك وبين المريض مش هتقدر تساعد المريض كويس ومُعظم الدراسات اللي بتتعمل على العلاج النفسي بتأكد أهمية العلاقة العلاجية ومركزيتها في العلاج.

  • أتعلمها منين؟

لو بتحب القراءة وبتعرف تقرأ بالإنجلش: (بالأولوية والترتيب والأهمية العملية)

  • كتاب Clinical interviewing بتاع اتنين اسمهم Flanagen : فيه 3 فصول بيتكلموا عن العلاقة العلاجية وتعمل إيه عشان تكون علاقة علاجية قوية. وعن إزاي تسمع المريض من غير توجيه وإزاي توجهه وإزاي تسأل والفرق بين أنواع الأسئلة. وإيه هي العلاقة العلاجية الكويسة. دول في الفصل التالت والرابع والخامس.

  • كتاب Intentional Interviewing: بتاع Allen Ivey. نفس الحاجات بس بتفاصيل أكتر ومتكلم عن الـ counselling بتوسع أكتر.

  • أول فصل في كتاب Psychiatric Interviewing بتاع Shea الفصل دا عن الـ Therapeutic alliance و الـ Empathy.

  • كتاب On becoming a person بتاع Carl Rogers: وهو أول حد اتكلم عن العلاقة العلاجية وعن أهميتها للعلاج النفسي. وكارل روجرز كان شايف إن العلاقة العلاجية لوحدها ممكن المريض يتحسن بيها.

لو بتحب تشوف فيديوهات:

  • الناس اللي عاملين كتاب Clinical Interviewing عاملين فيديوهات أونلاين للكتاب بيشرحوا فيه الكلام اللي في الكتاب بصورة مُختصرة وفي كمان تطبيق عملي. هسيب لينك في الكومنتات وأقول نشوفهم إزاي.

للأسف معرفش مصادر عربي بتتكلم عن العلاقة العلاجية فلو حد يعرف مصادر بالعربي يا ريت يقول لنا. وهبقى أكتب عن الموضوع إن شاء الله.

بعد كدا اتعلم أي مدرسة تكون مناسبة ليك ولشخصيتك عشان زي ما إحنا شايفين من الدراسات، المدرسة مش هي العامل الأساسي في تحسن المرضى:

هتكلم عن إزاي تبدأ تتعلم العلاج المعرفي السلوكي بما إن دي المدرسة اللي أنا بتعلمها:

  • لو ممكن تشوف حاجات بالإنجلش: يُستحسن تسمع من المصدر: كورسات Beck Institute. و Beck هو اللي عمل العلاج المعرفي وبعدين عمل دمج بعد كدا مع المدارس السلوكية. الكورسات موجودة أون لاين ود/ أحمد أبو الوفا كلمهم وجايب خصم 50% على كورساتهم للمصريين. لو بعتلهم إيميل هيبعتولك كود الخصم.

  • لو عاوز تتعلم بالعربي: اللي حضرتله هو د/أيمن الحسيني: والكورسات بتاعته كويسة جدًا وبيكون في Role-play عشان تطبق اللي اتعملته. اللي سمعت عنه كلام كويس لكن محضرتلوش : د/ الصبوة.


يا ريت بقى لو ليك خبرة أو رأي أو قرأت أي ريسيرش وتحب تشارك برأيك وتقول خبرتك وتقول للناس يتعلموا مدرستك العلاجية منين وإزاي يبقى كويس أوي.


المصدر:

Medical Psychotherapy. Chapter 11, Research in psychotherapy, Page 508.


المنشورات الأخيرة

إظهار الكل
Post: Blog2_Post
bottom of page