عشان نفهم ليه أشخاص ممكن يتعرضوا لنفس الحدث وفي منهم يظهر عليه أعراض الصدمة ومنهم ميظهرش عليه حاجة، هنحتاج نفهم إيه هي احتياجاتنا وقت الضغوط وإيه اللي بيخلينا أكثر عرضة لإن الضغوط تتحول لصدمات أو يخلينا مش قادرين نتخطي الصدمات.
أول حاجة محتاجين نعرفها عننا كبشر:
إن إدراكنا وتصرفاتنا وطريقة تفكيرنا وقُدرتنا على حل المشاكل واتخاذ القرار ورُؤيتنا لنفسنا ولكل حاجة حوالينا بتعتمد على حالتنا الداخلية عاملة إزاي ودا اسمه State-dependent functioning. لو أنا حاسس بالأمان إدراكي وتصرفاتي هتختلف تمامًا عن لو أنا حاسس بالتهديد أو الخطر. وفي كل حالة ومع كل نوع من المشاعر بيكون لينا إحتياج مُختلف. يعني مثلًا وقت الحُزن بنحتاج حد نشاركه حُزننا وبنحتاج مواساة (حتى لو مش عاوزين نعمل دا لأسباب كتير في تاريخنا).
الحالات اللي بنكون فيها بتتغير من وقت للتاني حسب إحنا مرينا بإيه وإحنا بنمر بإيه دلوقتي، لكن وانت بتقرأ عن الحالات حاول تفكّر في الناس اللي تعرضوا لصدمات: إيه هي الحالة اللي بيكونوا فيها مُعظم الوقت وإيه من الحالات بيكون صعب عليهم الوصول ليها.
إيه هي الحالات دي؟
الأولى: الهدوء والأمان والسلام والاتصال:
في الحالة دي بنبقى مُسترخيين، حاسين بالأمان، سواء في وجود شخص أو لوحدنا. ضربات قلبنا بتكون منتظمة، نَفًسنا مليان، عضلاتنا مُسترخية، قادرين نتواصل مع الآخرين وُمتاحين لمشاعرهم وقادرين نشارك مشاعرنا. وبنقدر نركز على المحادثة وممكن ننسى كل حاجة تانية. بنحس إننا متصلين بالشخص اللي قدامنا. التعاون مع الآخر ورُؤية هدف مُشترك بتكون أسهل في الحالة دي. وممكن نشوف إن العالم مكان آمن وممكن نحس بالرضا.
لو لوحدنا دماغنا ممكن يسرح وممكن نلاقي ترابط بين أفكار وحاجات مكناش شايفين بينها أي رابط قبل كدا، وقُدرتنا على التجريد بتكون أكبر وقُدرتنا على التخطيط وحل المشاكل والإبداع بتكون أكبر.
جهازنا العصبي في جُزء منه اسمه الـ Ventral Vagal pathway، لما بيكون نشط، هو اللي بيدخلنا في الحالة دي.
هنا بنقدر نوصل لأكبر جُزء من ذكائنا يعني لو مُعدل ذكائك 120 فانت في الحالة دي بتكون ما بين 100 و 120.
(أوقات الناس اللي تعرضوا للـ أو Developmental Trauma أو الصدمات المركبة Complex Trauma ممكن ميكونوش حسوا بالحالة دي إطلاقًا في وجود الناس ومش قادرين يحسوا بيها)
الحالة التانية: حالة الإحساس بالخطر المُحفزة (Hyperarousal): (بدرجاته)
ودرجات الإحساس بالخطر هنا ممكن تكون: ترقب أو قلق، أو خوف أو رُعب أو ممكن يبقى الموجود إحباط أو إنزعاج أو غضب.
هنا بنكون حاسين بالخطر والحاجة اللي بنكون عاوزين نعملها واحدة: اعمل حاجة عشان تأمن نفسك. اتحرك! بنكون شايفين إن مفيش حد نثق فيه. وبنشوف المكان اللي إحنا فيه مش آمن وبنبقى كإننا بنبص حوالينا عشان نأمن نفسنا من الخطر. ضربات قلبنا ممكن تزيد أو تبقى مش منتظمة، نَفَسنا أسرع أو قصير. ممكن عضلات من جسمنا تبقى مشدودة، ممكن نلاقي أجزاء من جسمنا عاوزة تتحرك، زي رجلينا. قُدرتنا على التركيز بتقل. ممكن نكون غضبانين وعاوزين نهاجم الآخر عشان نأّمن نفسنا. محادثاتنا هنا بتكون ميّالة للجدال وبنبقى عاوزين نكسب وخايفين نخسر.
هنا وصولنا للقشرة المُخية والتفكير بيها تفكير منطقي بيكون أصعب وقُدرتنا على حل المشاكل بتقل. وكل ما زاد الخطر والخوف كل ما قلت قُدرتنا على استخدام القشرة المُخية.
هنا الجُزء المسؤول عن الحالة دي من جهازنا العصبي هو السمبثاوي أو الـ Sympathetic أو المشهور بالـ Fight Flight Respose وبنكون Reflexive أو في حالة من رد الفعل.
هنا قادر توصل لذكاء 60-90. وممكن يوصل لـ 50-70 وقت الرعب.
فايدة الحالة دي: مواجهة الخطر أو الهروب منه.
الحالة التالتة: الإنفصال أو التجمد (Immobilization أو الـ Dissociation): (بدرجاته)
لما بنحس بإننا مش قادرين نعمل حاجة. أو مُحاصرين مش عارفين نهرب أو نواجه. أي فعل بنعمله بنبقى حاسين إنه مش مفيد ومش هيفيد بنفصل. ممكن نبقى مش حاسين بأي حاجة، مش عارفين أي حاجة. كإننا مش موجودين. بنشوف العالم مُظلم وميت وفارغ. ممكن نحس إننا منملين أو نحس بالخزي والوحدة واليأس، وإن محدش شايفنا ولا حاسس بينا. معندناش أي طاقة لفعل أي حاجة حتى الحاجات اليومية البسيطة وبنبقى حاسين بالهمدان. هنا ضربات قلبنا بتبقى قليلة، ضغط دمنا بيكون قليل. قُدرتنا على التفاعل مع الآخرين بتكون شبه مُنعدمة، تعبيرات وشنا بتكون جامدة ونادرة، قُدرتنا على النظر في عيون الآخرين والتواصل البصري بتكون قليلة، ووعينا بالآخر ومشاعره برده قليلة أو منعدمة.
فايدة الحالة دي: هو الحفاظ على أكبر قدر ممكن من الطاقة والحفاظ على الحياة بالسكون والتجمد.
هنا الجزء المسؤول عن الحالة دي من جهازنا العصبي هو ال Dorsal Vagal Pathway.
إحنا على مدار يومنا وفي حياتنا بنحتاج كل حالة من دول وكل حالة من دول ليها فوايدها ولما بناخد احتياجاتنا، القدرة على التحرك ما بين ما بين الحالات وتنظيمها بيكون أسهل.
هنلاقي الناس اللي تعرضوا لصدمات بيكونوا موجودين في حالة الإحساس بالخطر المُحفزة أو الانفصال والتجمد مُعظم الوقت، وبيكون في مثيرات كتير ممكن تدخلهم في الحالتين لو هما مش فيهم. وبيكون صعب جدًا الوصول للحالة الأولى اللي هي السلام والهدوء والاتصال وعشان نعرف ليه دا بيحصل هنبدأ من الأول خالص:
إزاي قُدرتنا على التنقل ما بين الحالات دي أو قُدرتنا على التعامل مع الخطر والإحساس بالأمان بتتكون؟
أو (Stress-response system) بتاعنا بيتشكل إزاي.
A person is a person through other persons. None of us comes into the world fully formed. We would not know how to think, or walk, or speak, or behave as human beings unless we learned it from other human beings. We need other human beings in order to be human.
يصبح الإنسان إنسانًا من خلال الآخرين. ما من أحد يُولد كامل النُضج. ولم نكن لنملك القُدرة على التفكير أو المشي أو الحديث أو الفعل لو لم نتعلم ذلك من إنسانٍ آخر، فنحنُ نحتاج للآخرين لنُصبح بشرًا. ─ ديسموند توتو
وإحنا مولودين دماغنا بيكون ¼ حجم دماغ الشخص البالغ. والدماغ بيكبر الـ ¾ دول خلال أول 3 سنين. ومن أُسس النمو، إن الدماغ بيتشكل وجهازنا العصبي بيتبني من خلال تجربتنا مع البيئة واللي حوالينا وخاصةً مُقدمي الرعاية الأساسيين. وأول 3 سنين هما من أهم الفترات اللي بتتشكل فيهم طُرق استجابتنا للضغوط - دا مش معناه إنه الطريقة اللي اتكونت بتستمر للأبد-. الأجزاء المسؤولة عن تنظيم المشاعر في الدماغ (الـ orbito-frontal cotrex وترابطها مع الـ Limbic system والـ Brain strem ) بتتكون في الفترة دي. وأوقات بيتسموا الـ Core Regulatory Networks.
دور نظام الاستجابة للضغط أو الـ Stress-response system من وقت الولادة هو الإحساس بالإنزعاج أو الـ Distress (زي الجوع، البرد، الخطر، أو أي احتياج زي الاحتياجات العاطفية مثلًا القُرب أو اللمس أو الخطر أو التحدي الخارجي) ومحاولة تحقيق الاحتياج أو التغلب على التحدي. المولود والطفل في الفترة الأولى بيعتمد في كل احتياجاته على مُقدم الرعاية. وبالتالي استجابته للضغوط بتتكون من خلال استجابات مُقدم الرعاية لاحتياجاته (إحساس بالإنزعاج عشان وجود الاحتياج بيتبعه تلبية الاحتياج بيتبعه الإحساس بالرضا والأمان). وبرده حسب البيئة وأمانها فنظام الاستجابة للضغوط بتاع شخص مولود في بيئة أمان غير نظام الضغط بتاع شخص مولود في بيئة نزاع أو حرب أو خطر مستمر. في الحالة التانية نظام الضغط هيحتاج يكون حساس للخطر أكتر.
فالطفل بيحتاج يتلبى احتياجاته بصورة منتظمة مُعظم الوقت، من هنا الطفل بيكون الإحساس بالأمان. فلو مُقدم الرعاية مضغوط أو مكتئب أو مش موجود أو مُسىء أو مصدر خوف أو مش مُنتظم في تلبية الاحتياجات مُعظم الوقت، نظام الاستجابة للضغوط بيبقى حسّاس للضغوط (إحساس بالإنزعاج بسبب وجود الاحتياج بيتبعه إنزعاج وعدم تلبية وهكذا وأوقات يكون بيتبعه عقاب أو ألم) فالطفل بيكون أقل قُدرة على الوعي باحتياجاته من البيئة ومن الأشخاص حواليه وطلبها وتوقع تلبيتها بيقل.
وتعاملات الطفل الأولى مع مُقدمي الرعاية بيشكل نماذجه عن الآخرين. هل البشر أمان؟ مُتوقعين؟ يُعتمد عليهم؟ أو هل هما مصدر خوف وفوضى وخطر وفقد؟ والنماذج دي هي اللي بتكون توقعاته عن مدى إمكانية الأشخاص والعالم في تلبية احتياجاته وممكن تحرك الشخص في طلب احتياجاته أو لأ. يعني لو مُقدم الرعاية للطفل كان رافض له أو مش موجود مُعظم الوقت أو كان مصدر خطر، دا بيزود توقع الطفل إن الآخرين هيكونوا زي مُقدم الرعاية، وبالتالي ممكن يتعامل على هذا الأساس. لو الطفل كان مُقدمى الرعاية بتوعه أمان ومُتوقعين وحساسين لاحتياجته بيتوقع إن الآخرين هيتعاملوا معاه بنفس الطريقة وبالتالي ممكن يطلب احتياجاته وبيتوقع إنها هتتلبى (كل ما بنكبر وكل ما بنتعامل مع ناس أكتر كل ما النماذج اللي بنبنيها بتكون مُعقدة أكتر وبيُعاد تشكيلها ومبتكونش بالبساطة دي).
لو فاكرين كان أول استجابة من استجاباتنا للخطر هي Flock أو اللجوء للآخرين، وجاية برده من نظام التعلق أو الـ Attachment System وهي أكتر وسيلة بتنظم مشاعرنا (دا لو كان رمز التعلق أمان وحسّاس لمشاعرنا ومُتوقع ويُعتمد عليه). فالمتوقع إنه وقت الخطر هنلجأ لرموز تعلقنا، لكن الناس اللي كان رموز تعلقهم مش متاحين أو رافضين أو مسيئين، وقت الخطر أو الإنزعاج ووقت المشاعر الشديدة زي الخوف أو الحزن، بيتبعها مشاعر ثانوية (غالبًا جاية من استجابات رموز التعلق) زي الخزي (أنا أستاهل اللي حصل - أنا وحش - أنا غبي) أو الذنب ( أنا المسؤول عن اللي حصل ) وبالتالي اللجوء لرموز التعلق أو اللجوء لرموز تعلق جديدة بيكون احتماليته أقل. فلو رموز التعلق نفسهم كانوا أو مازالوا مصدر خطر أو مش حساسّين لمشاعرنا أو لا يعتمد عليهم أو مسيئين بنبقى خسرانين أكبر وأهم طريقة من طُرق تنظيم مشاعرنا ومرونتنا وملجأنا وقت الضغط والخطر.
فمن أهم الحاجات اللي ممكن تحول الضغوط لصدمات وبتخلينا منقدرش نتخطى الصدمات هي عدم وجود أشخاص أمان مُتاحين وممكن اللجوء ليهم سواء قبل حدوث الصدمة أو الضغط أو أثناء حدوثها أو بعدها.
سو جونسون بتقول: الحب أفضل وسيلة للنجاة، فهو يدفعنا للارتباط عاطفيًا بأشخاص أعزاء يكونون لنا ملاذًا آمنًا من عواصف الحياة.
هكمل المرة الجاية عن طُرق تنظيمنا لمشاعرنا إن شاء الله وإيه اللي بيخلينا أكثر عرضة للصدمات.
لو حد عنده إضافة أو تعديل يا ريت يشاركنا.
المصادر:
Affect regulation and the origins of the self by Allan Schore.
What happened to you by Bruce Perry.
Polyvagal theory in therapy by Deb Dana.
عشان نفهم الصدمات أكتر محتاجين نفهم حاجة أساسية تانية اللي هي الذاكرة. فدا اللي هتكلم عنه انهارده.
ليه بنكون ذكريات وليه بنفتكر؟
تخيل إنك مفتكرتش مين ساعدك في حياتك، مين أذاك، مين بتنبسط معاه مين بتمل من قعدته، المطعم اللي كان أكله مُقرف وتعبت بعده. المطعم اللي أكلت فيه بيتزا وكنت بتزقطط من طعمها بعد كدا. لو مفتكرتش الطريق اللي بيوصلك لبيتك. لو مش فاكر المعلومات المهمة لشغلك؟ مش فاكر المهارات اللي انت اتعلمتها سواء الكتابة أو القراءة أو ركوب عجلة أو عربية أو عزف آلة موسيقية؟
ببساطة مش هتعرف تعيش. مش هتعرف تاخد قرار. مش هتعرف تعمل إيه. مش هتعرف انت مين.
بيتر ليفين بيقول: "التذكر هو عملية إعادة تشكيل مستمرة. تضيف أحيانًا وتمحو أحيانًا وتُعيد ترتيب الأحداث والمعلومات أحيانًا أخرى، كل ذلك من أجل هدف واحد؛ النجاة."
هل كل الذكريات واحنا بنفتكرها بنكون عارفين إن احنا بنفتكرها؟
ما نساه العقل، لم ينسه الجسد.
فرويد
في تجربة مشهورة عملها عالم أعصاب اسمه كلافارد مع مريضة عندها مشكلة في الذاكرة طويلة الأمد أو الـ Long term memory فالمريضة ممكن تعمل محادثة عن كل حاجة وانت معاها، لكن لو سبت الأوضة ورجعتلها تاني مش هتفتكرك ولا هتفتكر المُحادثة. وهتحتاج تعرف نفسك ليها تاني وتبدأ من جديد.
في يوم الدكتور خبّي دبوس في إيده، وهو بيسلم عليها اتشكت من الدبوس وحست بألم في إيديها. في مقابلتهم اللي بعدها المُتوقع إنها تنسى اللي حصل ولو سلّم عليها تمد إيديها تاني بما إن عندها مُشكلة في تكوين واسترجاع الذكريات طويلة الأمد، لكن اللي حصل شيء غريب جدًا: وهو بيمد إيده ليها رجّعت إيديها لورا ورفضت تسلّم عليه. ولمّا سألها ليه مسلمتيش؟ قالت "أحيانًا الدكاترة بيعملوا حاجات تألمك"
فإزاي سحبت إيديها وهي مش معندهاش ذكرى للي حصل؟
عشان نفهم دا محتاجين نفهم يعني إيه ذاكرة كامنة أو Implicit memory:
الذاكرة الكامنة ليها 3 أنواع كُبار:
النوع الأول من أنواع الذاكرة الكامنة والمهم جدًا في الصدمات له علاقة باستجابتنا للخطر: جسمنا بيتصرف إزاي وقت الخطر زي إننا نهرب من الخطر على شخص أمان أو بنتجمد أو بنهاجم كل دا بيتسجل على إنه ذاكرة كامنة عشان وقت الخطر بنحتاج رد فعل سريع ومفيش وقت للارتجال، وكل ما حاجة حصلت ونجيتنا في الماضي كل ما زادت احتمالية تكرارها. يعني مثلًا وانت عندك 6 سنين في كلب هاجمك ومكنش في مجال للهروب. فاللي حصل إن جسمك اتجمد ولما الكلب شافك واقف ومتجمد مقربش أكتر وسابك ومشي. هنا التجمد نجّاك من الخطر وكل فعل نجاه الجسم بيميل إنه يفتكره ويكرره، فجسمك هيميل إنه يتجمد لما يشوف كلب تاني حتى وانت كبير مع إنه عقلك واعي إنه الكلب دا مثلًا مربوط ومش هيقدر يهاجم أو دا كلب أليف أو "أنا كبير وأعرف أحمي نفسي دلوقتي" لكن وقت الخطر ممكن جهازك العصبي يسترجع الذاكرة الكامنة ويكررها من نفسه.
النوع التاني له علاقة بإحنا بنقرّب لإيه وبنبعد عن إيه أو الـ Approach , withdrawal responses فإحنا بنقرّب من كل حاجة ممكن تغذينا وبنبعد عن كل حاجة ممكن تألمنا. يعني مثلًا ممكن نلاحظ في وجود أشخاص أذونا قبل كدا أو أكل كان طعمه مُقرف إن في عضلات من جسمنا ممكن تتشد أو تنقبض وتتوتر وممكن نرجع بجسمنا لورا وممكن نتجنب النظر في عيون اللي أذونا. لو أشخاص كان وجودهم أمان ورعاية وحماية لينا ممكن نلاحظ جسمنا بيرتاح في وجودهم، قلبنا بيهدى، صدرنا ونفسنا بيوسع وممكن نحاول نقرّب منهم وعينينا ممكن متفارقش عينيهم. ودا زي اللي حصل بالظبط في تجربة كلافارد، اتكون ذكرى كامنة إن ممكن السلام على الأطباء يكون مؤلم وخطر، حتى لو مفيش ذكرى مُعلنة والمريضة قادرة تفتكرها لدا. فلما مد إيده في المرة التانية عشان يسلّم عليها إيديها بعدت من نفسها واتكون نموذج في دماغها إن " السلام على الأطباء مؤلم".
النوع التالت وهو أقلهم أهمية لينا في الصدمات هو الخاص بالحركات الجسدية المُتعلمة زي الرقص وركوب العجل والعربية أو أي مهارة عضلية: بعد ما بتتعلم ركوب العجل مثلًا، لما بتركب العجلة مش هتفضل تفتكر انت بتركب العجلة إزاي. إيدك بتمسك الجادون ورجلك على البدال والاتزان بيتظبط من نفسه. كل دا بييجي من الذاكرة الكامنة من غير ما تبذل مجهود في إنك تفكّر أو تفتكر. أو مثلًا المزيكا اللي ممكن تسمعها في دقيقة وبتشوف العازف بيعزفها على الآلة بسهولة وانسيابية دا بيكون وراه ساعات وساعات من التدريب من العازف عشان إيده تتتحرك من الذاكرة الكامنة من غير مجهود واعي كبير.
النوع دا من الذاكرة بيتخزن وبيظهر على هيئة:
أحاسيس جسدية زي انقباض أو توتر في عضلة أو رعشة إيد
أو مشاعر بأحاسيسها الجسدية برده زي تقل في الصدر أو وجع في القلب مع الحزن
أو تعبيرات وش، زي تعبيرات وش الخوف أو الغضب اللي ممكن تظهر علينا في وجود شخص أذانا قبل كدا أو الابتسام وسعة الصدر ونظرات العين الطويلة في وجود شخص كان وجوده مريح.
أو على هيئة نماذج أو أفكار أو مُعتقدات زي "الأطباء ممكن يعملوا حاجات تألمك" اللي اتكون مع الألم اللي حصل مع السلام بالإيد على الطبيب.
الحاجة المُهمة التانية في الذاكرة الكامنة هي قدرتها على تكوين ارتباطات شرطية لتسهيل الحياة علينا او الـ (Associative memory). يعني مثلًا رجوع الأم من الشغل وقرب خطواتها من الباب ممكن يرتبط بالحضن اللي هتحضنه ليك لما تشوفك. فمُجرد ما بتسمع خطواتها ممكن تحس بمشاعر الراحة والترحيب والانبساط. والعكس لو رجوعها هيرتبط بانتقاد أو عقاب، ممكن تحس بقلق وضربات قلبك تزيد وعضلات من جسمك تتشد أو تتوتر بمجرد ما بتسمع خطواتها بتقرب.
نيجي للنوع التاني والمعروف أكتر من الذاكرة: الذاكرة المعلنة أو الـ Explicit Memory:
إحنا بنبدأ نكون ذكريات مُعلنة بعد ما بنتم سنتين تقريبًا، لكن مُعظم البالغين بيبقوا فاكرين حاجات بسيطة من عمرهم قبل الـ 5 سنين.
هل دا معناه إن الفترة دي بما إننا مش فاكرينها مش بتأثر على حياتنا؟
بالعكس دي من أهم الفترات ومُعظمها بيتخزّن كذكريات كامنة أو Implicit memories ويظهر ويأثر علينا من غير ما نكون عارفين، فملاحظة بس جانبية للأهالي، إن مش معنى إن الطفل مش هيفتكر ذكرى واضحة ومُعلنة إن اللي حصل أو بيحصل مش هيأثر عليه. الطفل بيكون ذكريات كامنة وجهازه العصبي بيخزن كل التجارب العاطفية سواء داعمة أو مؤلمة، لكن خلينا نكمل عن الذاكرة المُعلنة:
الذاكرة المُعلنة بتحتاج إننا نركز انتباهنا على حاجة عشان تتخزن، وإحنا بنفتكر الذكرى بنبقى عارفين إننا بنفتكر. يعني لو سألتك آخر عيد ميلاد ليك إيه اللي حصل فيه؟ دا بيحتاج إنك تستدعي معلومات وحقايق ومشاعر متخزنة في الذاكرة المعلنة. وانت بتفتكر وبتحكي بتحس إنك بتفتكر وإنك بتستدعي حاجة من الماضي.
قرن آمون أو الـ Hippocampus هو المسؤول عن تخزين الذكريات المُعلنة قصيرة الأمد وتحويلها لذكريات طويلة الأمد ووقت الولادة بيكون نموه مش مُكتمل، وبيكتمل عند سن سنتين أو سنتين ونصف وعشان كدا دا العمر اللي بيبدأ عنده تخزين الذكريات المُعلنة. وقرن آمون مُرتبط بأجزاء تانية من الدماغ منها اللوزة أو الـ Amygdala وبقية العقل العاطفي أو الـ Limbic System وأجزاء تانية في القشرة المُخية عشان يحصل ربط ما بين تفاصيل حدث ما والمشاعر اللي اتحركت أثناؤه ونتجت عنه وتخزين الذكريات دي.
طيب إيه اللي بيحصل لما قرن آمون بيتعطل؟
المريضة اللي دكتور كلافارد عمل معاها التجربة واتشكت بالدبوس كان عندها إصابة في قرن آمون. فهي مش بتقدر تخزن ذكريات مُعلنة جديدة لكن دا ممنعش إنها تخزن ذكريات كامنة.
الكحول ممكن أوقات يعطّل قرن آمون، وبالتالي الشخص ممكن يقضي ليلة كاملة بيقابل ناس وبيعمل حاجات، ولما ينام ويصحى ميفتكرش أي حاجة من الليلة دي، لكن كل اللي كانوا حواليه وقتها يقولوا له إنك كنت واعي وفايق وهي دي الـ Blackouts.
طيب إيه اللي بيحصل أثناء الصدمات للذاكرة؟
المشاعر الشديدة زي الخوف الشديد أو الغضب الشديد اللي أكتر من الشخص يقدر يتحمله (أو خارج نافذة التحمل أو الـ Window of tolerance) ممكن تعطل وظيفة قرن آمون للحظات عن طريق هرمون الكورتيزول العالي.
لما قرن آمون بيتعطل، في خلل بيحصل في تخزين الذكريات المُعلنة فممكن ميتخزنش ذكريات مُعلنة خالص أو يتخزن صور متفرقة مش حكاية كاملة ليها بداية ونهاية ومعنى. لكن اللي بيتخزن كويس جدًا وحساسيته بتزيد هو الذاكرة الكامنة، فبيتخزن المشاعر والأحاسيس الجسدية وردود الفعل المرتبطة بالصدمة.
فمثلًا، بنت تعرضت لاعتداء جنسي وهي عندها 10 سنين، ومن وقتها وهي فاكرة صورة أو اتنين من اللي حصل. لكن بتلاقي نفسها بتحس بخوف شديد في وجود الرجالة عمومًا أو الرجالة اللي شبه المُعتدى. أو ممكن المكان اللي حصل فيه الاعتداء أو الحاجات اللي شبهه تسبب نفس المشاعر اللي حصلت في الاعتداء. ممكن لو كان في ريحة مُعينة للشخص، الريحة دي لو هي شمتها برده يحصل نفس المشاعر والأحاسيس الجسدية وممكن نفس رد الفعل. (ودا نتيجة الذاكرة الكامنة المُخزنة والارتباطات اللي اتكونت) ودا مشهور بمُثيرات الصدمة أو الـ Triggers.
هكمل المرة الجاية عن الصدمات إن شاء الله.
ولو حد عنده تعديل أو إضافة يا ريت يشاركنا.
وشكرًا ل د رضوى وليد على مراجعة البوست.
المصادر:
Trauma and memory by Peter Levine.
Mindsight by Daniel Siegel.
إيه هي الصدمة؟ إيه هي ردود أفعال الناس للصدمات اللي بيتعرضولها؟ وإيه هي الأحداث اللي ممكن تكون صادمة؟ وإيه الفرق ما بين ذِكرى عادية وذِكرى صادمة؟ وإيه الفرق ما بين استجابة عادية واستجابة زايدة ممكن تكون نتيجة صدمة قديمة؟ وإيه اللي بيخلّي شخصين يمرّوا بنفس التجربة وحد تحصل له صدمة وحد لأ؟ وإيه هي أنواع الصدمات؟
الأسئلة دي هحاول أجاوب عليها في البوست دا والبوستات الجاية. بس عشان نفهم كل دا هنحتاج نعرف شوية أساسيات الأول:
دماغنا عامل إزاي وبيستجيب للخطر إزاي؟
دماغنا عبارة عن ٣ طبقات فوق بعض ( دا وصف تبسيطي للتوضيح بناءً على The Triune Brain Model لبول ماكلين)
الطبقة الأولى والأقدم من المخ ودي موجودة في قاعدة المخ وبتتسمى الدماغ الزاحفي أو الـ Reptilian Brain عشان زي ما هي موجودة عندنا موجودة في معظم الكائنات بدايةً من الزواحف: ودا الجزء المسؤول عن الوظائف التنظيمية زي تنظيم درجة الحرارة، مثلًا لما تبقى حرّان يقول لجلدك يعرق ولو بردان يقول لعضلاتك ترتعش عشان تطلع حرارة، وعن تنظيم التنفس وضربات القلب وضغط الدم والنوم واليقظة والشهية. واتسمى الدماغ الزاحفي عشان دا بيمثل جُزء كبير من دماغ الزواحف اللي هما غالبًا بيبقوا عايشين في اللحظة ومعظم الوقت هما في حالة من رد الفعل.
الطبقة التانية بتتسمى الدماغ الثديي أو الـ Mammalian Brain (عشان دا موجود عند كل الكائنات اللي بتعيش في مجموعات وبتعتني بأطفالها) وبتتسمى برده الـ Limbic System أو الـ Emotional Brain أو الدماغ العاطفي - هستخدم الدماغ العاطفي في البوست دا والبوستات الجاية عشان أسهل - . الجُزء دا مسؤول عن المشاعر والروابط بين البشر وعن الخوف والغضب (اللي مسؤول عن جُزء كبير منهم اللوزة أو الـ Amygdala ودي جُزء من الطبقة دي برده) والقرف والحزن، والإحساس بالاستمتاع والحماس والدهشة والرغبة الجنسية (نظام المكافأة والحافز مُعظمه هنا). وهنا موجود جُزء مهم جدًا مسؤول عن تخزين الذكريات وهو قرن آمون أو الـ Hippocampus وهنعرف أهميته في الصدمات كمان شوية.
الطبقة التالتة وهي القشرة المُخية أو الـ Cortex ودي الطبقة الأجدد واللي بتنضج وبتكبر بالتدريج من وإحنا صُغيرين وبيكتمل نموها في نص العشرينات تقريبًا (أقصد هنا القشرة الجبهية أو الـ Prefrontal Cortex): ودي الطبقة المسؤولة عن الحاجات المُتطورة عندنا كبشر زي اللغة والتفكير والتخطيط والتجريد والإبداع والتحكم في النفس (فمثلًا في المراهقين القشرة الجبهية مبيكونش اكتمل نموها وعشان كدا حسابهم للعواقب بيكون أقل واندفاعيتهم بتكون أعلى).الجزء دا هو اللي بيعرف يحدد الوقت، ولما بيكون الجزء دا نشط بنعرف نفكّر في الماضي أو المستقبل وبنعرف نفرّق ما بين الماضي والحاضر والمستقبل.
في حاجة مهمة جدًا في الطبقتين الأولى والتانية (الدماغ الزاحفي والدماغ العاطفي): إن أي معلومات جاية من الحواس زي الرؤية والسماع واللمس والشم والتذوق بيعدّوا عليهم الأول قبل ما يوصلوا للأجزاء الأعلى من قشرة المخ. ودا مهم ليه؟
لإنه في الأوقات العادية كل المعلومات الجاية من الحواس بتوصل لقشرة المُخ عشان رد الفعل يبقى محسوب عواقبه، لكن في حالات الخطر بيكون العملي أكتر للنجاة إن رد الفعل يبقى سريع حتى لو مش دقيق. يعني مينفعش يبقى أسد جاي يهجم عليك وانت تقعد تحسب هتهاجم ولا هتهرب ولو هتهرب، هتهرب إزاي. بتكون محتاج رد فعل سريع جدًا عشان تعيش حتى لو رد الفعل دا مش دقيق ومش محسوب. (الجُزئين دول مبيقدروش يفرّقوا ما بين الماضي والحاضر والمستقبل ودا هنعرف أهميته في الصدمات كمان شوية).
الحاجة المهمة التانية: إن الـ 3 طبقات مُتصلين ببعض وبيأثروا على بعض. يعني مثلًا لو انت قاعد دلوقتي وحاسس بالأمان تمامًا وتخيّلت حد قُريب وعزيز عليك بيموت (ودا جاي من القشرة المُخية) هيبدأ الدماغ العاطفي يحس بالخوف إنك ممن تفقد الشخص دا فعلًا والحُزن على فُراق الشخص دا. والطبقة الأولى المنظمة للوظائف الحيوية تنشط وتبدأ تحس بضربات قلبك زايدة وتنفسك زاد وممكن تحس بتُقل على صدرك من الحُزن. ولو العكس حصل زي ما بيحصل مثلًا في وقت نوبات الهلع ممكن ضربات القلب تزيد لأي سبب ودا ينشط الخوف في الدماغ العاطفي وتبدأ تحس إن في خطر( لإنه إيه اللي مخلي ضربات قلبي تزيد كدا؟! وبالتالي تبدأ تتخيل إنك هتموت أو هتجيلك جلطة (القشرة المخية).
أو مثلًا الدماغ الزاحفي حسّ إن الجلوكوز في دمّك قلّ فبعت إشارات تحسسك بالجوع (الطبقة الأولى والتانية) وقشرة المُخ ممكن تبدأ تفكّر في إيه الأكل اللي ممكن يشبعني وييجي في بالك الأيس كريم والبيتزا طبعًا عشان الأكل الصحي هي آخر حاجة ممكن تيجي على بالك. فطول الوقت الـ 3 طبقات مُتصلين ببعض وبينظموا بعض.
طيب إزاي بنستجيب للخطر وإزاي بنحمي نفسنا منه؟
إيه هو الخطر الأول وإيه الفرق بينه وبين الضغط العادي؟
الضغط العادي: هو ضغط وتحدي لكنه مُتوقع ومُتوسط في الشدة وممكن نتحكم فيه. ودا تعرضنا له مهم جدًا وبيقوينا وبيزود الـ Resilience بتاعتنا. يعني مثلًا لو انت بتروح الجيم. انت اللي بتختار انت بتروح امتى فانت اللي بتتحكم في وقت الضغط. وانت اللي بتختار الوزن المناسب اللي هتشيله بحيث ميكونش سهل أوي ولا صعب أوي (مُتوسط). فلو انت رُحت أول يوم الجيم والكابتن خلّاك تشيل وزن أو تتمرن أزيد بكتير من اللي تقدر عليه، هيبقى عندك ميل إنك متروحش تاني، عشان هتحس إن الضغط دا شديد وغير مُحتمل بالنسبالك. ولو رُحت برده ولقيته بيمرّنك تمرين سهل جدًا ومحستش بأي فرق بعدها، ممكن متروحش تاني برده عشان مفيش تحدي وممكن تمل. فالضغط المُفيد بيكون: Predictable و Moderate و Controllable.
أما الخطر أو الضغط المُربك: بيكون غير مُتوقع أو شديد أو مُمتد. وهو دا اللي ممكن يتسبب في مشاكل. زي ما تكون راكب عربية وتحصل حادثة أو موت حد عزيز فجأة أو التعرض لاغتصاب أو عنف أو كوارث زي الزلازل. دي لا هي حاجة مُتوقعة ولا هي حاجة بسيطة. أو لو مثلًا اللي انت بتقدر تشتغله 8 ساعات في اليوم، وبعدين أُجبرت تشتغل 12 ساعة. مع الوقت هتلاقي تحملك بيقل وطاقتك بتقل وكل علامات الضغط المُمتد هبدأ تظهر عليك. فالخطر أو الضغط المُربك بيكون : Unpredictable أو Extreme أو Prolonged.
طيب إحنا بنستجيب للخطر في وقتها إزاي؟
النوع الأول من الاستجابات: هحكي موقف حصل معايا: وأنا قاعد في البنك فجأة بيرنّ جرس إنذار الحريق. بحس بضربات قلبي أسرع وتنفسي بيزيد وببص على الناس حواليّا وعلى المُوظفين بالذات وبراقب ردود فعلهم وبشوف همّا خايفين ولا لأ، وبيعملوا إيه. لقيتهم هاديين، محدش منهم بيتحرك أو بيجري أو بيهرب. بدأت أهدى وخمنت إنه يا إما عُطل أو تدريب. طلع الإنذار تدريب على الحريق اللي بيحصل من وقت للتاني. كل اللي بحكيه دا حصل في لحظات من غير ما أعمل أي حاجة منه بوعي. وأخدت بالي من اللي حصل دا بعدها. الاستجابة دي اسمها Flock ودي غالبًا أول استجابة بتحصل لما بنتعرض للخطر وفي ناس حوالينا، بنبص على اللي حوالينا عشان نتأكد فعلًا من وجود الخطر (خاصةً الناس اللي إحنا شايفين إنهم أقوى مننا أو عارفين أكتر مننا أو بنثق فيهم) ونشوف ردود فعلهم عشان ننجو معاهم أو نحتمي بيهم. ولو إحنا الأقوى والأقدر في وقت الخطر هيبقى في ميل إننا نبص على المسؤولين مننا (زي أولادنا مثلًا) عشان نحاول نحميهم.
طيب إيه اللي حصل في دماغي في الوقت اللي أنا حسيت فيه بالخطر؟
جرس الإنذار اللي أنا سمعته دا وصل للدماغ العاطفي. الجرس دا في أقل من لحظات بيتقارن بالذكريات المتخزنة في اللوزة أو الـ Amygdala (اللي هي جُزء من الدماغ العاطفي) ودي المسؤولة عن الإحساس بالخوف وتقدير الخطر. والجرس دا عشان مُرتبط بالخطر ومحتاج رد فعل سريع. ففي إشارة وصلت للدماغ الزاحفي عشان تجهزني للهروب أو المواجهة (Fight or Flight Response وهتكلم عنه بالتفصيل كمان شوية). ودا هيحتاج إن ضربات قلبي تزيد وتنفسي يزيد والدم يتضخ أكتر للعضلات عشان محتاج أهرب. وحصل الاستجابة الأولية بتاعة الـ Flock بإني بصيت على الموظفين المسؤولين في البنك. وعشان التركيز دلوقتي على النجاة والحفاظ على الحياة فمفيش مجال ولا مساحة لتنشيط قشرة المُخ المسؤولة عن التخطيط والإبداع والإحساس بالوقت. فالإحساس بالوقت بيقف عشان محتاج أكون في اللحظة وبعمل استجابة سريعة. ودا أول نوع من أنواع استجابتنا للخطر وهو الـ Flock.
النوع التاني: الهروب أو المواجهة (Fight or Flight أو اختصارًا الـ Arousal أو التحفيز)
في التحفيز أو الـ Arousal: دماغنا بيجهزنا للحركة سواء كانت الحركة دي للهروب أو المواجهة. فاللي بيحصل هنا إن ضربات القلب بتزيد والتنفس بيزيد وضغط الدم بيزيد عشان الدم يوصل أكتر للعضلات. الأدرينالين والكورتيزول بيتفرزوا والجلوكوز في دمنا بيتحول للعضلات. طيب بنهرب أو بنواجه بُناءً على إيه؟
المواجهة: لو دماغنا العاطفي عمل تقييمه وشاف إننا أكبر وأقوى من الخطر فهتكون الاستجابة هي المواجهة أو الـ Fight: مثلًا لو قُطة صُغيرة جاية تخربشك فبكل بساطة هتحاول تحمي نفسك وتُزقها. أو حد انت شايف إنه أصغر منك في الحجم جاي يهجم عليك وانت شايف إنك تقدر تصده وتوقفه فهتواجهه ومش هتهرب. خلينا ناخد مثال أقرب للحياة دلوقتي، لو مُوظف أقل منك في الشُغل اتعصب عليك هيبقى الميل إنك تكشم له وتتعصب عليه أكتر أو تزعق له (لو انت شايف إنه أضعف منك وإنك أقوى منه وانت عندك حق مثلًا). لكن لو رئيسك في الشُغل (وانت شايف إنه أقوى منك وعنده سُلطة أعلى منك أو يقدر يأذيك) اتعصب عليك فهيبقى في ميل لرد فعل تاني هتكلم عنه كمان شوية.
الهروب: لو دماغنا العاطفي عمل تقييمه وشاف إننا أضعف من مصدر الخطر وفي مجال للهروب وممكن نهرب بسهولة هنهرب بسرعة جدًا. مثلًا انت في الغابة وفي أسد بيهجم عليك وانت شايف إنك أضعف من الأسد والغابة مفتوحة قُدامك وتقدر تجري أو تهرب. وقتها هتحاول تهرب غالبًا.
النوع التالت: التجمد أو الـ Freeze أو "إعمل نفسك ميّت"
هنا لو التحفيز أو الـ Arousal مش مُفيد يعني لا قادر تواجه ولا قادر تهرب عشان مفيش مجال ولا مكان للهروب. تخيّل عندك 6 سنين وفي أسد دخل عليك الأوضة اللي انت قاعد فيها والأوضة مقفولة ومفيش مجال للهروب. هنا دماغك عارف كويس إنك متقدرش تواجه ولا في مجال للهروب، وأوقات ممكن تحاول تعمل الاتنين لكن ميجبوش نتيجة.
فهنا في رد فعل بيحصل عشان احتمال تنجو وهو إنك تتجمد، عشان دا احتمال يربك الأسد ويحسسه إنك ميّت أصلًا والضحية الميّتة ملهاش فايدة عشان ممكن يكون أكلها مُقرف. الهدف التاني للتجمد إنه بيأهلك لتحمل الألم وعدم الإحساس بيه قدر المُستطاع. واللي بيحصل بيكون عكس اللي بيحصل في التحفيز تمامًا. في التحفيز الدم بيروح للعضلات والأطراف عشان الهروب أو المواجهة. هنا ضربات القلب بتقل وضغط الدم بيقل عشان وصول الدم للأطراف يقل عشان لو اتصابوا، النزيف يكون أقل. في التحفيز اللي بيتفرز هو الأدرينالين، لكن في التجمد الجسم بيفرز مُسكناته الداخلية (الـ Endorphins & Enkephalins) عشان لو حصل جرح إحساسك بيه وبألمه يكون أقل. ودي الاستجابة اللي اللي بتحصل لما نحس إننا مُحاصرين وعاجزين. (والاستجابة دي فهمها مهم جدًا لفهم الصدمات)
الاستجابة الرابعة: التودد أو الـ Fawn response وأوقات بتتسمى Tend and befriend أو لطف وعطّف.
هنا لو مصدر الخطر بشر ومن الناس اللي وجودك وحياتك بتعتمد عليهم. مثلًا طفلة عندها 7 سنين وأبوها بيرجع من الشُغل عصبي ولو هي طلبت منه حاجة أو حاولت تتكلم معاه بيتعصب وبيضربها. هنا الحفاظ على العلاقة أساسي للبنت ومهم بالنسبالها رضا أبوها عنها. فممكن تبدأ تتودد لأبوها عشان يعمل لها اللي هي عاوزاه. يعني مثلًا لما يرجع هتعمل له حاجة يشربها من غير ما يطلب. هتكلمه بلُطف وتحاول تهديه. هتبدأ تلاحظ كل حاجة هو بيتعصب منها ومش هتعملها. هتبدأ من الآخر هي اللي تاخد بالها من احتياجاته وتنسى احتياجاتها تمامًا وتحاول ترضيه عشان بس تحس إنها في أمان وتحافظ على العلاقة معاه وتتجنب الأذى اللي بيحصل بسبب عصبيته.
ودي الاستجابة اللي كنت بتكلم عنها اللي ممكن تحصل لما رئيسك في الشغل اللي ممكن يأذيك يتعصب عليك وانت شايف إنه خطر وانت متقدرش تسيب الشُغل دلوقتي. ممكن اللي يحصل وقتها إنك تحاول تلطّف معاه وتحاول ترضيه.
هكمل المرة الجاية عن الصدمة نفسها وإيه اللي بيحصل وقتها وبتتخزن في الدماغ إزاي.
وشكرًا لـ د رضوى وليد على مُراجعة البوست والتعديل عليه.
ولو في حد عنده إضافة أو تعديل يا ريت يشاركنا.
المصادر:
What Happened To You by Bruce D. Perry.
Behave by Robert Sapolsky.